میرٹھ کی صابن فیکٹری میں زوردار دھماکہ، 4 افراد کی موت، متعدد اسپتال میں داخل

 میرٹھ کی صابن فیکٹری میں زوردار دھماکہ، 4 افراد کی موت، متعدد اسپتال میں داخل

میرٹھ: اتر پردیش کے میرٹھ میں منگل کی صبح ایک صابن کی فیکٹری میں زوردار دھماکے کے بعد پوری عمارت منہدم ہوگئی۔ اس حادثے میں 4 افراد کی موت ہوگئی، جبکہ متعدد زخمی ہوگئے۔ زخمیوں کا مقامی اسپتال میں علاج جاری ہے۔ دھماکہ اتنا زور دار تھا کہ فیکٹری کے ٹکڑے ٹکڑے ہو گئے۔ واقعہ کی اطلاع ملتے ہی مقامی انتظامیہ کی ٹیم موقع پر پہنچ گئی اور راحت اور بچاؤ کا کام شروع کیا۔ حادثے میں زخمی ہونے والے افراد کو فوری طور پر اسپتال میں داخل کرایا گیا۔

معلومات کے مطابق صابن فیکٹری میں زوردار دھماکہ ہوا۔ دھماکے سے عمارت کے ٹکڑے ہوگئے۔ اس کی شدت کا اندازہ اس بات سے لگایا جا سکتا ہے کہ ملبہ علاقے میں دور دور تک پھیلا ہوا ہے۔ قریبی مکانات کو بھی نقصان پہنچا ہے۔ دھماکے کے وقت فیکٹری میں 8 کے قریب مزدور موجود تھے۔ یہ سب بری طرح زخمی ہو گئے۔ بعد میں ان میں سے 4 لوگوں کی علاج کے دوران موت ہوگئی۔ دیگر زخمی مزدور بھی زندگی اور موت کی جنگ لڑ رہے ہیں۔