ابھی تہاڑ جیل سے ہی سرکار چلائیں گے اروند کیجریوال، دہلی ہائی کورٹ نے دیا بڑا جھٹک

ابھی تہاڑ جیل سے ہی سرکار چلائیں گے اروند کیجریوال، دہلی ہائی کورٹ نے دیا بڑا جھٹک

 وزیراعلی اروند کیجریوال کو بڑا جھٹکا دیتے ہوئے دہلی ہائی کورٹ نے منگل کو ان کی درخواست کو مسترد کر دیا جس میں مبینہ ایکسائز پالیسی گھوٹالہ سے متعلق منی لانڈرنگ کیس میں ان کی گرفتاری کو چیلنج کیا گیا تھا۔

نئی دہلی : وزیراعلی اروند کیجریوال کو بڑا جھٹکا دیتے ہوئے دہلی ہائی کورٹ نے منگل کو ان کی درخواست کو مسترد کر دیا جس میں مبینہ ایکسائز پالیسی گھوٹالہ سے متعلق منی لانڈرنگ کیس میں ان کی گرفتاری کو چیلنج کیا گیا تھا۔ اس کا مطلب ہے کہ وہ ابھی تہاڑ جیل میں ہی رہیں گے اور وہاں سے حکومت چلائیں گے۔ جسٹس سورن کانتا شرما نے اپنا حکم عام آدمی پارٹی (اے اے پی) کے قومی کنوینر کی درخواست پر سنایا ہے۔

فیصلہ سناتے ہوئے جج نے کہا کہ یہ ضمانت کی سماعت کا کیس نہیں ہے بلکہ گرفتاری کی قانونی حیثیت کو چیلنج کیا گیا ہے۔ ای ڈی نے جو حقائق عدالت کے سامنے پیش کئے ہیں، اس کے مطابق کیجریوال اس گھوٹالے کی سازش میں ملوث ہیں۔ ای ڈی نے یہ بھی کہا کہ اروند کیجریوال، ذاتی طور پر اور AAP کنوینر کے طور پر، شراب گھوٹالہ کی سازش میں ملوث تھے۔

جسٹس سورن کانتا شرما نے یہ بھی کہا کہ کیجریوال گواہوں کے بیانات کو خارج نہیں کر سکتے لیکن ان پر جرح ضرور کر سکتے ہیں۔ انہوں نے اپنے فیصلے میں کہا کہ ای ڈی نے کافی ثبوت کی بنیاد پر کیجریوال کو گرفتار کیا ہے۔

جج نے کیجریوال کی اس دلیل کو بھی مسترد کر دیا جس میں گرفتاری کے وقت پر سوالات اٹھائے گئے تھے۔ جج نے سخت الفاظ میں کہا کہ عدالت سیاست کا میدان نہیں ہے۔ ججز قانون سے چلتے ہیں سیاست سے نہیں۔ وزیراعلیٰ سمیت سبھی کے لیے قانون برابر ہے۔ جج نے یہ بھی کہا کہ گواہوں کے بیانات کو مسترد نہیں کرسکتے۔