مرکزی وزیر شانتنو ٹھاکر کا دعوی، ملک بھر میں اگلے ہفتہ سے لاگو ہوجائے گا سی اے اے
مرکزی وزیر شانتنو ٹھاکر کا دعوی، ملک بھر میں اگلے ہفتہ سے لاگو ہوجائے گا سی اے اے
شہریت ترمیمی قانون (سی اے اے) کے بارے میں مرکزی وزیر شانتنو ٹھاکر نے بتایا کہ یہ قانون پورے ملک میں کب نافذ ہوگا۔ مرکزی وزیر نے دعویٰ کیا کہ اگلے ایک ہفتے میں ملک میں سی اے اے نافذ ہو جائے گا۔
نئی دہلی : شہریت ترمیمی قانون (سی اے اے) کے بارے میں مرکزی وزیر شانتنو ٹھاکر نے بتایا کہ یہ قانون پورے ملک میں کب نافذ ہوگا۔ مرکزی وزیر نے دعویٰ کیا کہ اگلے ایک ہفتے میں ملک میں سی اے اے نافذ ہو جائے گا۔ انہوں نے کہا کہ میں اسٹیج سے گارنٹی دے رہا ہوں کہ اگلے 7 دنوں میں نہ صرف بنگال میں بلکہ پورے ملک میں CAA نافذ ہو جائے گا۔ شانتنو ٹھاکر جنوبی 24 پرگنہ کے کاک دوئیپ میں ایک جلسہ عام میں تقریر کر رہے تھے۔
سی اے اے قانون کا مقصد پاکستان، بنگلہ دیش اور افغانستان سمیت تین پڑوسی ممالک کی چھ کمیونٹیز کو تیز رفتاری سے شہریت فراہم کرنا ہے۔ سی اے اے قانون کو منظوری دے دی گئی ہے لیکن اس پر عمل آوری کے قوانین کو ابھی تک نوٹیفائی نہیں کیا گیا ہے اور بی جے پی لیڈر شانتنو ٹھاکر کے مطابق یہ اگلے ہفتے میں ہوسکتا ہے۔
بنگال کے بن گاؤں سے بی جے پی کے لوک سبھا رکن شانتنو ٹھاکر نے اپنے CAA بیان میں مرکزی وزیر داخلہ امت شاہ کی بات کا اعادہ کیا ہے۔ گزشتہ سال دسمبر میں امت شاہ نے کہا تھا کہ بی جے پی کی قیادت والی مرکزی حکومت سی اے اے کو نافذ کرے گی اور اسے کوئی نہیں روک سکتا۔ ان کا ریمارکس ترنمول کانگریس کی سپریمو اور مغربی بنگال کی وزیر اعلیٰ ممتا بنرجی پر نشانہ تھا، جو سی اے اے کی مخالفت کر رہی ہیں۔
