مافیا ڈان مختار انصاری کی دل کا دورہ پڑنے سے موت، باندہ جیل میں بگڑگئی تھی طبیعت
مافیا مختار انصاری کی موت ہوگئی ہے۔ مختار انصاری کو باندہ میڈیکل کے آئی سی یو میں داخل کرایا گیا تھا۔ 9 ڈاکٹروں کی ٹیم نگرانی کر رہی تھی۔ مختار انصاری کی موت کے بعد مئو ، غازی پور اور باندہ میں سیکورٹی بڑھا دی گئی ہے۔
باندہ : مافیا ڈان مختار انصاری کی موت ہوگئی ہے ۔ مختار انصاری کو باندہ میڈیکل کے آئی سی یو میں داخل کرایا گیا تھا۔ 9 ڈاکٹروں کی ٹیم ان کی نگرانی کر رہی تھی۔ باندہ میڈیکل کالج کی جانب سے میڈیکل بلیٹن جاری کر دیا گیا ہے۔ مختار انصاری کی موت کی وجہ حرکت قلب بند ہونا بتائی گئی ہے۔ مختار انصاری کے خلاف 65 سے زائد مقدمات درج ہیں۔ 21 ستمبر 2002 کو پہلی بار سزا سنائی گئی تھی۔ 2 مقدمات میں عمر قید کی سزا سنائی گئی تھی۔ 17 ماہ میں 8 بار سزا ہوئی تھی۔
اس دوران مئو ، غازی پور اور باندہ میں سیکورٹی بڑھا دی گئی ہے۔ باندہ میڈیکل کالج کے باہر بڑی تعداد میں پیرا ملٹری فورسز کو تعینات کردیا گیا ہے۔ ڈی جی پی ہیڈ کوارٹر نے چوکسی برقرار رکھنے کی ہدایات دی ہیں۔
مختار انصاری کے اہل خانہ باندہ کیلئے روانہ ہو گئے ہیں۔ مختار انصاری کا چھوٹا بیٹا عمر انصاری باندہ کیلئے روانہ ہو گیا ہے۔ مختار کے بڑے بیٹے عباس انصاری کی بیوی نکہت اور افضال انصاری کچھ وقت پہلے ہی غازی پور سے باندہ کے لیے روانہ ہوئے ۔ ہائی کورٹ میں مختار انصاری کی نمائندگی کرنے والے ایڈوکیٹ اجے سریواستو بھی باندہ کے لیے روانہ ہوگئے ہیں۔
ادھر محمد آباد میں مختار انصاری کے آبائی گھر پر لوگ جمع ہونا شروع ہو گئے ہیں۔ ان کے گھر کے ارد گرد پولیس فورس تعینات کر دی گئی ہے۔ غازی پور، مئو، اعظم گڑھ پولیس کو ہائی الرٹ پر رہنے کی ہدایت دی گئی ہے۔
