غیرمقیم ہندوستانیوں کی شادی کارجسٹریشن پاسپورٹ سےلنک کرنےکی تجویز، لاکمیشن کی سفارش
غیرمقیم ہندوستانیوں کی شادی کارجسٹریشن پاسپورٹ سےلنک کرنےکی تجویز، لاکمیشن کی سفارش
لاء کمیشن کی رپورٹ کے مطابق، کمیشن کی رائے ہے کہ مجوزہ مرکزی قانون اتنا جامع ہونا چاہیے کہ غیر مقیم ہندوستانیوں (این آر آئی) اور ہندوستانی نژاد اوورسیز شہری (او سی آئی) کی ہندوستانی شہریوں کے ساتھ شادی سے متعلق تمام پہلوؤں کا احاطہ کرے۔
لاء کمیشن کی رپورٹ: لاء کمیشن نے غیر مقیم ہندوستانیوں (این آر آئی) اور ہندوستانی شہریوں کے درمیان شادیوں کے بارے میں کئی سفارشات کی ہیں۔ اس میں لاء کمیشن نے کہا ہے کہ این آر آئی اور ہندوستانی شہریوں کے درمیان شادی کے معاملات میں دھوکہ دہی ہو رہی ہے اور یہ کافی تشویشناک ہے۔ ایسے میں اس حوالے سے قانون اور لازمی رجسٹریشن کی ضرورت ہے۔لاء کمیشن کے چیئرمین جسٹس (ریٹائرڈ) رتوراج اوستھی نے وزارت قانون کو ‘غیر مقیم ہندوستانیوں اور ہندوستان کے بیرون ملک شہریوں سے متعلق ازدواجی مسائل سے متعلق قانون’ کے عنوان سے ایک رپورٹ پیش کی ہے۔
رپورٹ کے مطابق، کمیشن کی رائے ہے کہ مجوزہ مرکزی قانون اتنا جامع ہونا چاہیے کہ غیر مقیم ہندوستانیوں (این آر آئی) اور ہندوستانی نژاد اوورسیز شہری (او سی آئی) کی ہندوستانی شہریوں کے ساتھ شادی سے متعلق تمام پہلوؤں کا احاطہ کرے۔
لاء کمیشن کے چیئرمین نے کیا کہا؟
جسٹس (ر) رتوراج اوستھی نے وزیر قانون ارجن رام میگھوال کو اپنے ‘کورنگ لیٹر’ میں کہا، “غیر مقیم ہندوستانیوں (این آر آئی) اور ہندوستانی شہریوں کے درمیان شادی کے معاملات میں بڑھتا ہوا فراڈ تشویشناک ہے۔رپورٹس ایک بڑھتے ہوئے رجحان کو اجاگر کرتی ہیں جہاں یہ شادیاں دھوکہ دہی پر مبنی ہوتی ہیں، جس سے ہندوستانی میاں بیوی، خاص طور پر خواتین، کو ایک نازک صورتحال میں ڈال دیتے ہیں۔
