روایتی چیک کے ذریعے ادائیگی کا نظام ختم کردیا گیا ہے، اب رقم کے ٹرانسفر کا عمل K2 اور سیوا سندھو پلیٹ فارمز کے ذریعے انجام دیا جائے گا۔
پی ٹی آئی
– وقف بورڈ نے مستحقین کو براہِ راست رقم منتقل کرنے کے لیے اپنے بینک اکاؤنٹ کو سنگل نوڈل ایجنسی (SNA) اکاؤنٹ میں تبدیل کردیا ہے۔ (فیس بک/یو ٹی قادر آفیشل)
بنگلورو، 4 اکتوبر:
کرناٹک حکومت پیش اماموں اور مؤذنین کو اعزازیہ ادا کرنے کے نظام کو مزید شفاف اور آسان بنانے کے لیے اقدامات کررہی ہے۔ اس سلسلے میں ریاستی وقف بورڈ نے براہِ راست فائدہ منتقلی (DBT) نظام کے تحت مستحقین کے بینک کھاتوں میں رقم منتقل کرنا شروع کردیا ہے۔
اقلیتی بہبود، حج اور وقف کے وزیر یو ٹی قادر کے مطابق، محکمۂ مالیات نے رواں مالی سال سے چیک کے ذریعے اعزازیہ ادا کرنے کے روایتی نظام کو ختم کردیا ہے۔
اس کے تحت وقف بورڈ کے بینک اکاؤنٹ کو پبلک فنانشل مینجمنٹ سسٹم (PFMS) کے تحت سنگل نوڈل ایجنسی (SNA) اکاؤنٹ میں تبدیل کردیا گیا ہے۔ اب ادائیگیوں کا عمل K2 اور سیوا سندھو پلیٹ فارمز کے ذریعے انجام دیا جائے گا۔
پہلے مرحلے میں مجموعی طور پر 15,936 مستحقین میں سے 6,735 افراد کے بینک کھاتوں میں اعزازیے کی رقم براہِ راست منتقل کردی گئی ہے۔
مزید 2,369 مستحقین کی تفصیلات سیوا سندھو محکمہ کو فراہم کردی گئی ہیں اور ان کی ادائیگی کا عمل جاری ہے، جبکہ باقی مستحقین کو آخری مرحلے میں اس سہولت کے تحت شامل کیا جائے گا۔
یو ٹی قادر نے یقین دہانی کرائی ہے کہ ستمبر اور اکتوبر کے تمام زیرِ التوا اعزازیوں کی ادائیگی نومبر کے اختتام تک کردی جائے گی۔
