قائد حزب اختلاف نے کانگریس حکومت پر الزام عائد کیا کہ وہ ٹرانسپورٹ کارپوریشنوں کے نقصانات کا بوجھ مسافروں پر ڈال رہی ہے، جبکہ ڈی کے شیوکمار نے ڈیزل کی بڑھتی ہوئی قیمتوں کو اس اضافے کی وجہ قرار دیا۔
سالار نیوز
– اشوک نے الزام لگایا کہ کانگریس حکومت کی گارنٹی اسکیموں نے مالی بوجھ میں اضافہ کیا ہے۔ (اے این آئی)
بنگلورو، 4 نومبر:
اسمبلی میں قائد حزب اختلاف آر اشوک نے بدھ کے روز کہا کہ کانگریس حکومت کی جانب سے بس کرایوں میں اضافے کا فیصلہ غیر قانونی ہے۔ انہوں نے اس فیصلے کے خلاف بی جے پی کی جانب سے احتجاج شروع کرنے کا بھی اعلان کیا۔
بنگلورو میں ایک پریس کانفرنس سے خطاب کرتے ہوئے انہوں نے کہا کہ ’’محکمہ ٹرانسپورٹ میں کرایوں میں اضافہ غیر قانونی ہے۔ قیمتوں میں 30 سے 40 فیصد تک اضافہ کیا گیا ہے۔ کرناٹک کی تاریخ میں اس سے پہلے کبھی اتنا بڑا اضافہ نہیں دیکھا گیا۔‘‘
انہوں نے مزید کہا کہ ’’کانگریس حکومت اور ڈی کے شیوکمار پر محکمہ ٹرانسپورٹ کے 5,800 کروڑ روپے سے زیادہ واجب الادا ہیں۔ محکمہ مالیات پہلے ہی واضح کرچکا ہے کہ ریاستی خزانے میں رقم نہ ہونے کی وجہ سے وہ یہ رقم ادا نہیں کرسکتا۔‘‘
اشوک نے کہا کہ ’’محکمہ ٹرانسپورٹ کے اس مالی بوجھ کو عوام پر منتقل کرنا غیر قانونی ہے۔‘‘
انہوں نے اس اضافے کی تمام تر ذمہ داری کانگریس حکومت کی گارنٹی اسکیموں، بالخصوص ’شکتی اسکیم‘ پر عائد کی، جس کے تحت کرناٹک کی تمام خواتین کو بسوں میں مفت سفر کی سہولت فراہم کی جاتی ہے۔
اشوک نے اعلان کیا کہ بی جے پی جمعرات سے اس فیصلے کے خلاف احتجاج شروع کرے گی۔
دوسری جانب وزیراعلیٰ ڈی کے شیوکمار نے بی جے پی کے الزامات کا جواب دیتے ہوئے کہا کہ احتجاج کرنے کے بجائے پارٹی کو وزیراعظم نریندر مودی سے ایندھن کی قیمتوں میں کمی کا مطالبہ کرنا چاہیے۔
شیوکمار نے کہا کہ ’’دس دن پہلے ٹرانسپورٹ کارپوریشنوں کے پاس ڈیزل خریدنے کے لیے بھی رقم نہیں تھی۔ حکومت کو فنڈز فراہم کرنے پڑے۔ انہیں بھاری نقصان ہورہا تھا، اس لیے ہم نے انہیں مفت مالی مدد فراہم کی۔‘‘
انہوں نے مزید کہا کہ ’’ڈیزل کی قیمتوں میں اضافہ ہوا ہے۔ جب ڈیزل، پٹرول اور گیس کی قیمتوں میں اضافہ ہوا تھا تو انہوں نے اس وقت آواز کیوں نہیں اٹھائی؟‘‘
شیوکمار نے یقین دہانی کرائی کہ اگر ڈیزل کی قیمتوں میں کمی کی جاتی ہے تو بس کرایوں میں بھی کمی کردی جائے گی۔
