ڈیزل کی برآمدات پر ٹیکس 8.5 روپے سے بڑھا کر 11.5 روپے فی لیٹر کر دیا گیا ہے، جبکہ پٹرول کی برآمدات پر عائد ٹیکس صفر کر دیا گیا ہے۔
– ایوی ایشن ٹربائن فیول (ATF) کی برآمدات پر ونڈ فال ٹیکس بھی اگلے پندرہ دنوں کے لیے بڑھا کر 11 روپے فی لیٹر کر دیا گیا ہے۔ (کینوا)
نئی دہلی، 31 اکتوبر:
مرکزی حکومت نے ہفتہ کے روز ڈیزل اور ایوی ایشن ٹربائن فیول (ATF) کی برآمدات پر ونڈ فال ٹیکس میں اضافہ کر دیا، جبکہ پٹرول کی برآمدات پر عائد ٹیکس کو 31 اکتوبر سے شروع ہونے والے اگلے پندرہ دنوں کے لیے صفر کر دیا ہے۔
ATF کی برآمدات پر ڈیوٹی معمولی اضافے کے ساتھ 10.5 روپے سے بڑھا کر 11 روپے فی لیٹر کر دی گئی ہے۔
ڈیزل کی برآمدات پر خصوصی اضافی ایکسائز ڈیوٹی (SAED) اور روڈ و انفراسٹرکچر سیس سمیت مجموعی ٹیکس اب 8.5 روپے سے بڑھا کر 11.5 روپے فی لیٹر کر دیا گیا ہے۔
دوسری جانب، پٹرول کی برآمدات پر عائد ڈیوٹی 2.5 روپے فی لیٹر سے کم کرکے صفر کر دی گئی ہے۔ یہ تبدیلی اگلے پندرہ دنوں تک نافذ رہے گی۔
وزارتِ خزانہ کی جانب سے جاری کردہ نوٹیفکیشن کے مطابق ٹیکس کی نئی شرحیں 31 اکتوبر سے نافذ العمل ہوں گی۔
مغربی ایشیا میں بڑھتی ہوئی کشیدگی کے درمیان حکومت نے 27 مارچ کو ڈیزل اور ATF کی برآمدات پر ڈیوٹی عائد کی تھی، جس کی شرح میں ہر پندرہ دن بعد نظرِ ثانی کی جاتی رہی ہے۔ بعد ازاں 16 مئی سے پٹرول کی برآمدات پر بھی یہ ٹیکس نافذ کر دیا گیا تھا۔
وزارت نے واضح کیا ہے کہ ملک میں گھریلو استعمال کے لیے فراہم کیے جانے والے پٹرول اور ڈیزل پر موجودہ ٹیکس کی شرحوں میں کوئی تبدیلی نہیں کی گئی ہے۔
حکومت نے مغربی ایشیا میں جاری جنگ کے دوران ایندھن کی ملک میں دستیابی یقینی بنانے کے لیے ونڈ فال ٹیکس عائد کیا تھا۔ اس کا ایک مقصد عالمی منڈی میں خام تیل کی قیمتوں میں اضافے کے باعث برآمد کنندگان کو ملنے والے اضافی منافع کے غیر ضروری فائدے کو روکنا بھی تھا۔
اس ٹیکس کا بنیادی مقصد برآمدات کی حوصلہ شکنی کرکے ملک میں پٹرولیم مصنوعات کی مناسب دستیابی کو یقینی بنانا تھا، تاکہ مغربی ایشیا کے بحران کے دوران مقامی ضروریات متاثر نہ ہوں۔
