ملزم نے پاوتی وارسے اسکیم کے تحت کھاتہ منتقل کرنے کے لیے مبینہ طور پر 50 ہزار روپے رشوت طلب کی تھی۔
سالار نیوز
– درخواست پر کارروائی کرنے کے لیے رشوت طلب کیے جانے کے بعد شکایت کنندہ نے لوک آیوکتہ سے رجوع کیا۔ (علامتی تصویر)
چکبالاپور، 2 نومبر:
لوک آیوکتہ کے اہلکاروں نے پیر کے روز سدلگھٹہ سٹی میونسپل کونسل (سی ایم سی) کے دفتر میں تعینات سیکنڈ ڈویژن اسسٹنٹ (ایس ڈی اے) ناگراج کو ایک شکایت کنندہ سے 25 ہزار روپے رشوت لیتے ہوئے رنگے ہاتھوں گرفتار کر لیا۔
چکبالاپور کے لوک آیوکتہ ایس پی ڈاکٹر شیوکمار کے مطابق، سدلگھٹہ کی رہائشی اسماء نے پاوتی وارسے اسکیم کے تحت اپنی مرحومہ والدہ کے نام سے قانونی وارثوں کے نام کھاتہ منتقل کرنے کے لیے درخواست دی تھی۔
الزام ہے کہ ناگراج نے درخواست پر کارروائی کرنے کے لیے 50 ہزار روپے رشوت طلب کی تھی، جبکہ مولا نامی ایک درمیانی شخص نے اس معاملے میں لین دین طے کرانے میں مدد کی تھی۔
اس کے بعد اسماء نے لوک آیوکتہ سے رجوع کیا، جس پر اہلکاروں نے جال بچھایا اور کارروائی کرتے ہوئے ناگراج اور مولا دونوں کو گرفتار کر لیا۔
