نئی دہلی:26 مئی (ایجنسی) دہلی چیف منسٹر اروند کجریوال نے جمعہ کے روز کہاکہ وہ کانگریس صدر ملکاراجن کھرگے اور سینئر لیڈر راہل گاندھی سے ملاقات کے خواہاں ہیں تاکہ پارلیمنٹ میں مرکز کی جانب سے بیو روکریٹس کی تعیناتی او رتبادلے کے متعلق پیش کئے جانے والے آرڈیننس کے خلاف ان کی حمایت حاصل کرسکیں - ٹوئٹر کے ذریعہ مذکورہ چیف منسٹر نے کہاکہ بی جے پی حکومت کی جانب سے منظور کردہ غیر جمہوری اور غیرآئینی آرڈنینس کے خلاف پارلیمنٹ میں کانگریس کی حمایت حاصل کرنے اور وفاقی ڈھانچے پر عام حملے پر اور موجودہ سیاسی صورتحال پر تبادلے خیال کیلئے کانگریس کے صدر کھرگے جی اورراہل گاندھی سے ملاقات کرنے آج صبح وقت مانگا گیاہے-اسی خصوص میں جمعرات کے روز کجریوال اور پنجاب چیف منسٹر بھگوت مان نے نیشنلسٹ کانگریس پارٹی صدر شرد پوار سے ملاقات کی جنھوں نے بی جے پی کی زیرقیادت حکومت کے اس اقدام کے خلاف مکمل حمایت کی پیشکش کی ہے-کجریوال،بھگوت مان اور دیگر قائدین سے نصف گھنٹے کی ملاقات کے بعد پوار نے اعلان کیاکہ بی جے پی کی جانب سے حملے کی زد میں جمہوریت ہے- ہم تمام کو اس کی حفاظت کرنا چاہئے-عوام کی منتخبہ حکومتوں کے حقوق چھیننے اور ان کیلئے رکاوٹیں کھڑی کرنے کی کوششیں کی جارہی ہیں -ہم پارلیمنٹ میں اے اے پی کی لڑائی کی مکمل حمایت کریں گے- اس سے ایک دن قبل کجریوال اورمان نے مہارشٹرا کے سابق چیف منسٹر ادھو ٹھاکرے سے ملاقات اور شیو سینا یو بی ٹی کی حمایت حاصل کرنے میں کامیاب رہے ہیں -سپریم کورٹ کی جانب سے ریاستی حکومت کودہلی میں عہدیداروں کے تقرر اور تبادلے کے متعلق اختیارات فراہم کرنے کے فوری بعد مرکز نے اس بنیاد پر سپریم کورٹ کے فیصلے کی منسوخی کیلئے ایک آرڈنینس لایا کہ دہلی کو مکمل ریاست کا درجہ حاصل نہیں ہے اور مرکزنے تمام اختیارات لفٹننٹ گورنر کو دے دئے-راجیہ سبھا میں آرڈیننس کو روکنے کیلئے ملک بھر کی اعلیٰ اپوزیشن جماعتوں سے ملاقات کیلئے کجریوال دورے پر ہیں - بہار اور مغربی بنگال میں ان کے ہم منصب نے اے اے پی سے اپنی بھرپور حمایت کا اظہار کیاہے-