واشنگٹن-24مئی(یو این آئی)سابق امریکی صدر ڈونالڈ ٹرمپ کے خلاف فوجداری مقدمے کی کارروائی کی تاریخ کا اعلان کر دیا گیا ہے جو آئندہ سال 25مارچ کو ہوگی-غیر ملکی میڈیا کے مطابق کاروباری ریکارڈ میں رد و بدل اور پورن سٹار کو خفیہ ادائیگی پر ڈونالڈ ٹرمپ آئندہ سال مارچ میں فوجداری مقدمے کی کارروائی کا سامنا کریں گے - مین ہٹن کی عدالت کے جج وان مرچن نے ٹرمپ کے خلاف فوجداری مقدمے کے تحت کارروائی کی تاریخ کا اعلان کیا-سابق صدر فلوریڈا سے بذریعہ ویڈیو لنک عدالتی کارروائی میں شریک ہوئے - عدالت نے ٹرمپ کو آگاہ کیا کہ وہ کیس سے متعلق ثبوتوں پر کھلے عام بات نہیں کر سکتے ہیں -ڈونالڈ ٹرمپ پر جیوری کی کارروائی کے منٹس، گواہوں کے بیانات اور پراسی کیوٹرز کو درکار دیگر دستاویزات سے متعلق بات کرنے پر پابندی عائد کی گئی ہے اور عدالت نے متنبہ کیا ہے کہ اگر انہوں نے پابندیوں کی خلاف ورزی کی تو انہیں توہین عدالت کا مرتکب بھی ٹھہرایا جا سکتا ہے -جج وان مرچن نے سابق صدر کو بتایا کہ عدالت انتخابی مہم کے دوران ان کی سرگرمیوں کو محدود کرنے کا ارادہ نہیں رکھتی بلکہ انہیں مکمل آزادی حاصل ہے کہ وہ خود پر عائد الزامات کو مسترد یا ان کے خلاف اپنا دفاع کر سکتے ہیں -دوسری جانب سماعت کے بعد اپنی سماجی رابطوں کی ویب سائٹ ٹروتھ سوشیل پر ڈونالڈ ٹرمپ نے لکھا کہ ان کے آزادی اظہار کے حقوق کی خلاف ورزی کی گئی ہے - ان کا کہنا تھا کہ انتخابات کے وسط میں مارچ 25کی کارروائی کی تاریخ ان پر زبردستی مسلط کی گئی جو دراصل‘انتخابات میں مداخلت’ہے -واضح رہے کہ ڈونالڈ ٹرمپ پر رواں سال مارچ میں فرد جرم عائد ہوئی تھی تاہم سابق صدر خود پر عائد 34مجرمانہ الزامات کو مسترد کر چکے ہیں -دوسری جانب ٹرمپ 2024کے صدارتی انتخابات کیلئے تاحال اپنی مہم گرمجوشی سے چلا رہے ہیں -سابق امریکی صدر ڈونالڈ ٹرمپ کے خلاف فوجداری مقدمے کے تحت کارروائی شروع کرنے کی تاریخ کا اعلان کر دیا گیا ہے- جبکہ دوسری جانب وہ صدارتی انتخابات کی مہم بھی گرم جوشی کے ساتھ چلا رہے ہیں -