نئی دہلی، 12اپریل (یو این آئی) فارم میں واپس آئے کپتان روہت شرما (65) کی نصف سنچری اور تلک ورما کی 41 رن کی اننگز کی بدولت ممبئی انڈینس نے منگل کو انڈین پریمیئر لیگ (آئی پی ایل) کے ایک سنسنی خیز مقابلے میں دہلی کیپٹلس کو چھ وکٹوں سے شکست دے کرپوائنٹس ٹیبل میں اپنا کھاتہ کھولا۔دہلی نے اس مقابلے میں اکشر پٹیل (54) اور ڈیوڈ وارنر (51) کی نصف سنچریوں کی مدد سے ممبئی کے سامنے 173رن کا ہدف رکھا۔ ممبئی نے یہ ہدف آخری گیند پر حاصل کرکے اس سیزن کی پہلی جیت درج کی۔دہلی نے 98رن پر پانچ وکٹ گنوا دیے تھے لیکن اکشر نے آخری اووروں میں اننگز کو سنبھال لیا۔ انہوں نے آئی پی ایل کی اپنی پہلی نصف سنچری بناتے ہوئے کپتان وارنر کے ساتھ چھٹے وکٹ کے لئے 67رن کی بیش قیمتی شراکت داری کی، جس کی مدد سے میزبان ٹیم کو آل آؤٹ ہونے سے قبل باعزت اسکور تک پہنچ سکی۔روہت اور تلک نے دوسرے وکٹ کے لئے نصف سنچری شراکت داری کرکے ممبئی کو جیت کے بہت قریب پہنچادیا، لیکن دہلی نے چار رن کے اندر تین وکٹ لے کر میچ میں سنسنی خیزی واپس لادی۔جب ممبئی کو 12گیندوں پر 20رن درکار تھے، تب ممبئی نے 19ویں اوور میں مستفیض الرحمان کے خلاف 15رن جوڑے۔ اینریچ نورتجے نے آخری اوور کی ابتدائی چار گیندوں پر صرف تین رن دیے، تاہم ٹم ڈیوڈ نے آخری گیند کو مڈ آف کی طرف کھیل کر دو رن چراتے ہوئے ممبئی کو جیت دلائی۔روہت نے ممبئی کی اننگز کا آغاز کرتے ہوئے دوسری گیند سے ہی جارحیت کا مظاہرہ کیا۔ انہوں نے پہلے اوور میں مکیش کمار کو ایک چھکا اور دو چوکا لگاتے ہوئے 14رن جوڑے۔ ایشان کشن نے دوسرے اینڈ سے ان کا بخوبی ساتھ دیا اور دوسرے اوور میں مستفیض الرحمان کو تین چوکے لگائے۔ دونوں کے بے باک رویے کی وجہ سے ممبئی چھ اووروں میں 68رن تک پہنچ گئی، جو اس سیزن میں پاور پلے میں ان کا سب سے بڑا اسکور ہے۔پاور پلے کے بعد اسپنروں نے کشن کو پریشان کیا اوروہ 26گیندوں پر 31رن بنانے کے بعد دباؤ میں آکر رن آوٹ ہو گئے۔تلک ورما کو اپنی لے تلاش کرنے میں کچھ وقت لگا، لیکن روہت نے اپنی بیٹنگ کلاس کو جاری رکھا اور 29گیندوں پر نصف سنچری مکمل کی۔ تلک نے بھی دوسرے سرے سے ہاتھ کھولے اور روہت کے ساتھ دوسرے وکٹ کے لئے 68کی شراکت داری کی۔یہ شراکت ممبئی کو فتح کے قریب لے گئی، حالانکہ چار رن کے وقفے میں تین وکٹوں کے گرنے کے ساتھ میچ میں ایک اہم موڑ دیکھنے کو ملا۔مکیش کمار نے16ویں اوور کی پانچویں اور چھٹی گیند پر تلک اور سوریہ کمار یادو (0) کو آؤٹ کیا۔ مستفیض نے اگلے اوور میں روہت شرما کو پویلین لوٹا دیا۔روہت کے آؤٹ ہونے کے بعد ممبئی کو جیت دلانے کی ذمہ داری ٹم ڈیوڈ اور کیمرون گرین پر تھی۔ دونوں نے19ویں اوور میں مستفیض کو ایک ایک چھکا لگایا۔ ڈیوڈ کو آخری اوور کی دوسری گیند پر ایک زندگی ملی جب مکیش نے شارٹ مڈ آن پر ان کا کیچ چھوڑ دیا۔ ڈیوڈ نے پھر آخری گیند پر دو رن لے کر ممبئی کو ہدف تک پہنچا دیا۔ممبئی نے ٹاس جیت کرپہلے گیندبازی کرنے کا فیصلہ کیا اور دہلی ابتدائی اوورز میں جارحانہ نظر آئی۔ کپتان روہت شرما نے وکٹ کی تلاش میں چوتھا اوور ہریتک شوقین کو دیا اور انہوں نے پرتھوی شا (15) کو آؤٹ کر کے ممبئی کو پہلی کامیابی دلائی۔ممبئی کے اسپنرز نے وارنر کو ہاتھ کھولنے کا موقع نہیں دیا، لیکن تیسرے نمبر پر بلے بازی کرنے آئے منیش پانڈے نے کچھ اچھے شاٹس کھیلے اور پاور پلے کے اختتام پر دہلی کو 51  تک لے گئے۔ منیش اور وارنر کے درمیان دوسرے وکٹ کیلئے43  کی شراکت ہوئی جسے پیوش چاولہ نے منیش کو آؤٹ کر کے توڑا۔
منیش نے 18 گیندوں پر پانچ چوکوں کی مدد سے 26 رن بنائے۔ پیوش نے انہیں آؤٹ کرنے کے بعد روومن پاول اور للت یادو کو بھی آؤٹ کیا، جبکہ ڈیبیو کرنے والے یش دھول ریلی میریڈیتھ کا شکار ہوگئے۔