نیویارک: 26مارچ (ایجنسی) امریکہ کی پہلی باحجاب مسلم خاتون جج نادیہ کہف نے قرآن پاک کے اس نسخے پر ہاتھ رکھ کر حلف اٹھایا جو انہیں ان کی دادی سے وراثت میں ملا تھا-50 سالہ خاتون جج نادیہ کہف نے نارتھ جرسی نیوز آؤٹ لیٹ کو انٹرویو دیتے ہوئے کہا کہ میں بہت خوش ہوں اور اسے اپنے لیے باعث اعزاز سمجھتی ہوں، مجھے خوشی ہے کہ عدالت کا بنچ نیو جرسی کے تمام رہائشیوں کی نمائندگی کرے گا-نادیہ کہف کی اسپیشلائزیشن فیملی لا میں ہے اور وہ امیگریشن کیسوں پر بھی کام کر چکی ہیں، 2003 سے وہ کونسل آن امریکن-اسلامک ریلیشنز کے نیو جرسی بورڈ میں خدمات انجام دے رہی ہیں، یہ ایک مسلم شہری حقوق کی تنظیم ہے -ایک سال کے انتظار کے بعد اب نادیہ کہف نیو جرسی کی پاساک کاؤنٹی میں سپریم کورٹ کی جج بن گئی ہیں، انہیں نیو جرسی کے گورنر فل مرفی نے نامزد کیا تھا-انہوں نے اپنی حلف برداری کی تقریب کے دوران کہا کہ مجھے امریکی ریاست نیو جرسی میں مسلم اور عرب کمیونٹی کی نمائندگی کرنے پر فخر ہے، میں چاہتی ہوں کہ نوجوان نسل یہ دیکھے کہ وہ اپنے مذہب پر کسی خوف کے بغیر عمل کر سکتے ہیں -نادیہ کہف 2 سال کی تھیں جب ان کے اہل خانہ نے شام سے امریکہ ہجرت کی، وہ پاساک کاؤنٹی کے اسلامک سینٹر کی صدر ہیں جو ریاست کی سب سے بڑی مساجد میں سے ایک ہے، وہ وفا ہاؤس کی قانونی مشیر بھی ہیں جو گھریلو تشدد اور سماجی خدمات کیلئے سرگرم این جی او ہے-نادیہ کہف نے 1994 میں مونٹی کلیئر اسٹیٹ یونیورسٹی سے بی اے کیا تھا، انہوں نے نیو جرسی کی سیٹن ہال یونیورسٹی سے قانون کی ڈگری (جیورس ڈاکٹریٹ یا جے ڈی) حاصل کی، یہ ڈگری امریکہ میں پیشہ قانون میں دستیاب اعلیٰ ترین ڈگری سمجھی جاتی ہے، وہ 2002 سے نیو جرسی میں لا کی پریکٹس کر رہی ہیں اور نامی گرامی وکیل سمجھی جاتی ہیں -