نئی دہلی:26مارچ(ایجنسی) راہل گاندھی کی لوک سبھا رکنیت منسوخ کئے جانے کے خلاف کانگریس پارٹی نے اتوار (26 مارچ 2023)کو ملک گیر احتجاج کیا- اسی ضمن میں کانگریس نے دہلی کے راج گھاٹ کے علاوہ تمام ضلعی ہیڈکوارٹرس میں ایک دن کا ستیہ گرہ کیا- راج گھاٹ پر کانگریس کے دھرنے میں پارٹی صدر ملکارجن کھرگے اور جنرل سکریٹری پرینکا گاندھی سمیت متعدد لیڈروں اور کارکنوں نے شرکت کی-راج گھاٹ پر کانگریس کے دھرنے سے خطاب کرتے ہوئے پارٹی صدر ملکارجن کھرگے نے بی جے پی حکومت اور وزیر اعظم مودی کو ہدف تنقید بناتے ہوئے کہا کہ اگر انہیں کچلنے کی کوشش کی گئی تو اس کا منہ توڑ جواب دیا جائے گا- کھرگے نے سوال کیا کہ راہل گاندھی نے تو انتخابی جلسہ سے ان بھگوڑوں کے خلاف آواز اٹھائی تھی جو ملک کا پیسہ لے کر بھاگ گئے، تو پھر اس سے مودی جی کو درد کیوں ہوا!انہوں نے کہا کہ اگر راہل گاندھی پارلیمنٹ میں رہے تو اڈانی کا مسئلہ اٹھائیں گے- جس شخص پر تین ہزار کروڑ روپے تھے اس پر پہلے 50 ہزار کروڑ پھر 2 لاکھ کروڑ روپے ہوئے اور صرف ڈھائی سال میں 12 لاکھ کروڑ روپے کا مالک بن گیا، ایسا کس طرح ہوا یہی راہل گاندھی نے پوچھا- اتنی دولت کہاں سے آئی، کس نے دی- اڈانی کے ساتھ آپ بیرون ملک جاتے ہو، جب وزیر اعظم بننے کیلئے آئے، حلف لینے کیلئے دہلی آئے تو اس کے خصوصی جہاز میں آتے ہو- ایسی باتیں پوچھیں تو ہمیں ملک کا غدار قرار دیا جاتا ہے- کیونکہ مودی جی ہمیشہ چاہتے ہیں کہ کوئی مودی جی کے خلاف بات نہ کرے- کوئی سچ نہ بولے- اس لئے راہل گاندھی کا کہنا ہے کہ وہ کبھی نہیں ڈریں گے اور عدم تشدد کے ذریعے جنگ لڑیں گے-
کائر ہے اس دیش کا پردھان منتری:پرینکاگاندھی
راہل گاندھی کی پارلیمنٹ کی رکنیت منسوخی کے خلاف راج گھاٹ پر کانگریس کے ستیہ گرہ سے بولتے ہوئے پارٹی کی جنرل سکریٹری پرینکا گاندھی نے وزیر اعظم مودی پر سخت حملہ بولا- پرینکا گاندھی نے کہا کہ کائر ہے اس دیش کا پردھان منتری- لگا دو کیس مجھ پر- جیل لے جاؤ مجھے بھی- لیکن سچائی یہی ہے کہ اس دیش کا پردھان منتری کائر ہے، جو اپنی ستا کے پچھے چھپا ہوا ہے!انہوں نے کہا کہ اگر آپ سمجھتے ہو کہ تمام ایجنسیوں کو لگا کر، چھاپہ مار کر ہمیں ڈرا سکتے ہیں تو غلط سوچتے ہو، ہم اور مضبوطی سے لڑیں گے- اس ملک کی جمہوریت کیلئے ہم کچھ بھی کرنے کیلئے تیار ہیں -(تفصیلی خبرصفحہ5پر)
لڑائی اب دو محاذوں پر:سلمان خورشید:سلمان خورشید نے کہا کہ لڑائی اب دو محاذوں پر ہے- ایک قانون کے ذریعے لڑی جائے گی اور دوسری سڑکوں پر- لندن میں راہل نے جو کہا وہ مودی حکومت کے خلاف اور ملک کے خلاف نہیں ہے- بلکہ میں سمجھتا ہوں کہ جب حکومت کی کمیوں پر بولا جاتا ہے تو ملک مضبوط ہوتا ہے- مجھے فخر ہے کہ میں کانگریس کا کارکن ہوں -
راہل نے او بی سی کی توہین کیسے کی؟ گہلوت:راجستھان کے وزیر اعلیٰ اشوک گہلوت نے سال 2017 کے ایک واقعہ کا حوالہ دیتے ہوئے کہا کہ جو کچھ وزیر اعظم نریندر مودی نے گجرات میں کیا تھا، اب بی جے پی پورے ملک میں کرنا چاہتی ہے لیکن میں پوچھنا چاہتا ہوں کہ راہل گاندھی نے او بی سی کی توہین کیسے کی؟ کیا وہ لوگ جو ملک سے پیسہ لے کر بھاگے ہیں وہ او بی سی ہیں؟