سری نگر: 25جنوری(یواین آئی) جموں وکشمیر نیشنل کانفرنس کے صدر ڈاکٹر فاروق عبداللہ نے بدھ کے روز کہا کہ محض الیکشن میں کامیابی حاصل کرنے کیلئے ملک میں جو جو نفرت کا ماحول پیدا کیا جارہاہے وہ ایک بہت ہی خطرناک اور تشویشناک رجحان ہے، جو اس ملک کو تباہی اور بربادی کی طرف لے کر جائے گا۔ ان باتوں کا اظہارموصوف نے پہلگام میں نامہ نگاروں سے بات چیت کے دوران کیا۔بھارت جوڑو یاترا سے متعلق پوچھے گئے ایک سوال کے جواب میں ڈاکٹر فاروق عبداللہ نے کہا کہ اس وقت ملک میں بے حد نفرتیں پھیلائیں جارہی ہے، ہندوں، مسلمانوں، سکھوں، عیسائیوں اور دیگر مذاہب کے درمیان دوریاں پیدا کی جارہی ہیں۔ملک کے آئین کی خلاف ورزی ہورہی ہے اور یہ رجحان اس ملک کی بنیادوں کو ہلا رہاہے اور بھارت جوڑو یاترا کا پیغام نفرتوں کو ختم کرنا اور وطن کو جوڑنا ہے جسے تفرت کے ذریعے توڑا گیا ہے۔ڈاکٹر فاروق عبداللہ نے کہا کہ یہ ملک یہاں کے رہنے والے ہر ایک باشندے کا ہے پھر چاہئے اُس کا مذہب کوئی بھی اور وہ کسی بھی زبان میں کیوں نہ بات کرتا ہو۔ یہ ملک اُسی صورت میں ترقی کرسکتا ہے جب ہم سب ایک ہوکر رہیں گے۔ایک سوال کے جواب میں صدر نیشنل کانفرنس نے کہا کہ ہمارے یہاں بہت مشکلات آئیں، ایسی مشکلات بھی آئیں جب ہمارے پنڈت بھائیوں کو یہاں سے ہجرت کرنی پڑی اور میں دعا کرتا ہوں کہ یہاں ایسا ماحول قائم ہو کہ وہ اپنی من مرضی یہاں واپس آکر اپنے گھروں میں پھر سے خوشی اور عزت کیساتھ رہ سکیں۔ انہوں نے کہاکہ ملک میں اپوزیشن کے اتحاد کے بارے میں پوچھے گئے سوال کے جواب میں ڈاکٹر فاروق عبداللہ نے کہا کہ ہم میں ہمت، صبر اور اُمید ہونی چاہئے اور اوپر والے پر پورا ایمان ہونا چاہئے۔ اپوزیشن بھی ایک دن متحد ہوگی لیکن جب اوپر والی کی مرضی ہوگی۔