سری نگر:10جنوری (یو این آئی) نیشنل کانفرنس کے نائب صدر اور سابق وزیر اعلیٰ عمر عبداللہ کا کہنا ہے کہ ولیج ڈیفنس گارڈز کو ہتھیار فراہم کرنے سے موجودہ مرکزی سرکار کے وہ دعوے غلط ثابت ہو رہے ہیں کہ دفعہ370 کی تنسیخ کے بعد جموں و کشمیر میں حالات ٹھیک ہوں گے انہوں نے کہا کہ راجوری کے حملے، وادی کے حالات اور سکیورٹی فورسز میں مزید اضافہ کرنے سے معلوم ہوتا ہے یہاں حالات پوری طرح سے قابو میں نہیں ہیں اور حکومت اس طرح کے اقدام کرنے پر مجبور ہے۔ موصوف سابق وزیر اعلیٰ نے ان باتوں کا اظہار منگل کے روز جنوبی کشمیر کے ضلع اننت ناگ میں نامہ نگاروں کے سوالوں کے جواب دینے کے دوران کیا۔انہوں نے وی ڈی سیز کو ہتھیار فراہم کرنے کے بارے میں پوچھے جانے پر کہاکہ مجھے لگتا ہے کہ یہ حکومت قبول کر رہی ہے کہ جو سال2019 میں ملک کے ساتھ وعدے کئے گئے وہ ادھورے رہ گئے۔ ان کا کہنا تھاکہ پانچ اگست 2019 میں ملک میں کہا گیا کہ اگر جموں وکشمیر میں بندوق ہے تو اس کی وجہ دفعہ370 ہے اور یہ دفعہ جاتے ہی جموں وکشمیر میں بندوق کا اثر بھی کم ہوگا’۔عمر عبداللہ نے کہا کہ لیکن بات یہ ہے کہ جو حملے راجوری میں ہوئے، وادی کے جو حالات ہیں اور جو سکیورٹی فورسز کی تعداد میں اضافہ کیا جا رہا ہے تو معلوم ہوتا ہے کہ حالات پوری طرح سے قابو میں نہیں ہیں اور حکومت ایسے اقدام کرنے پر مجبور ہے۔انتخابات کے متعلق یک سوال کے جواب میں انہوں نے کہاکہ ہم انتخابات منعقد کرانے کیلئے ان سے بھیک نہیں مانگیں گے، یہ ہمارا حق ہے۔ان کا کہنا تھاکہ لوگوں کے زخموں پر مرہم پٹی کرنے کی بجائے انہیں تنگ کیا جا رہا ہے اس لئے الیکشن نہیں کر رہے ہیں ’۔انہوں نے کہاکہ یہ لوگ جانتے ہیں کہ جب حکومت آئے گی تو وہ لوگوں کے زخموں پر مرہم لگائیں گے۔