دوسہ: 18 دسمبر (یو این آئی) کانگریس کے سابق صدر راہل گاندھی کی قیادت میں کنیا کماری سے کشمیر تک نکالی جانے والی کانگریس کی بھارت جوڑو یاترا ایک دن کے آرام کے بعد راجستھان کے دوسہ ضلع کے سیکرائی علاقے کے کالاکھو گاؤں سے آج صبح8بجے شروع ہوئی۔ راجستھان میں بھارت جوڈو یاترا کا 14واں دن ہے، ہفتہ کو آرام کرنے کے بعد اتوار کو یاترا دوبارہ شروع ہوئی۔ یاترا کے آغاز کے وقت میں آج نظر ثانی کی گئی اور اسے صبح 6بجے کی بجائے 7.30بجے شروع ہونا تھا لیکن یہ تقریباً 8 بجے شروع ہوئی۔یاترا شروع ہونے سے پہلے ہی کانگریس لیڈروں اور لوگوں کی بھیڑ جمع ہوگئی اور لوگ یاترا کے تئیں زبردست جوش و خروش دکھا رہے ہیں۔ وزیر اعلیٰ اشوک گہلوت، کانگریس کے ریاستی صدر گووند سنگھ ڈوٹاسارا، سابق نائب وزیر اعلیٰ سچن پائلٹ، کانگریس لیڈر کے سی وینوگوپال، جے رام رمیش، گورنمنٹ ڈپٹی چیف وہپ مہیندر چودھری اور کئی ایم ایل اے اور بہت سے دوسرے لیڈر راہل گاندھی کی یاترا میں شامل ہیں۔