وزیراعظم مودی کی پوتن سے بات چیت

RushdaInfotech December 17th 2022 urdu-news-paper
وزیراعظم مودی کی پوتن سے بات چیت

نئی دہلی:16 دسمبر (یو این آئی) وزیر اعظم نریندر مودی نے آج روس کے صدر ولادیمیر پوتن سے بات کی اور اس بات کا اعادہ کیا کہ یوکرین اور روس کے درمیان تنازعہ کو حل کرنے کا واحد راستہ بات چیت اور سفارت کاری ہے۔ وزیراعظم کے دفترکے مطابق ٹیلی فونک گفتگو میں دونوں رہنماؤں نے شنگھائی تعاون تنظیم کے سربراہی اجلاس کے ساتھ ساتھ سمرقند میں اپنی میٹنگ کے بعد توانائی کے شعبے میں تعاون، تجارت اور سرمایہ کاری، دفاعی اور سکیورٹی تعاون اور دیگر اہم شعبوں کے ساتھ ساتھ دوطرفہ تعلقات کے متعدد پہلوؤں کا جائزہ لیا۔ مسٹر مودی نے یوکرین میں جاری تنازعہ کے تناظر میں بات چیت اور سفارت کاری کے اپنے مطالبے کو دہرایا اور کہا کہ تنازعات کو حل کرنے کا یہی واحد راستہ ہے۔روس کے سفارت خانے کے مطابق، مسٹر پوتن نے مسٹر مودی کی درخواست پر یوکرین روس جنگ کے بارے میں اپنے جائزے اور خیالات کا اشتراک کیا۔ دونوں رہنماؤں نے ایک دوسرے کے ساتھ مسلسل رابطے میں رہنے پر اتفاق کیا۔وزیر اعظم نے صدر پوتن کے ساتھ ہندوستان کی موجودہ جی 20 چیئرمین شپ پر بھی تبادلہ خیال کیا اور اپنی اہم ترجیحات پر روشنی ڈالی۔
انہوں نے شنگھائی تعاون تنظیم کی ہندوستان کی سربراہی کے دوران مل کر کام کرنے کی امید بھی ظاہر کی۔


Recent Post

Popular Links