شہر کے اولڈ مدراس روڈ پرریپڈروڈ کا تعمیری کام تیزی سے جاری بی بی ایم پی چیف کمشنر نے سڑک سمیت دیگر تعمیری کاموں کا معائنہ کیا

RushdaInfotech November 25th 2022 urdu-news-paper
شہر کے اولڈ مدراس روڈ پرریپڈروڈ کا تعمیری کام تیزی سے جاری  بی بی ایم پی چیف کمشنر نے سڑک سمیت دیگر تعمیری کاموں کا معائنہ کیا

بنگلور۔24نومبر(سالارنیوز)وہائٹ ٹاپنگ یا ٹنڈر شور کے تحت سڑکوں کی تعمیر کے دوران متعلقہ سڑک پر گاڑیوں کے گزر پر پابندی عائد کی جاتی ہے،جس کی وجہ سے ٹرافک جام کا مسئلہ پیدا ہوجاتا ہے۔اس سے بچنے کے مقصد سے بروہت بنگلور مہانگر پالیکے(بی بی ایم پی) ملک میں ہی پہلی مرتبہ تجرباتی طور پر ریپڈ روڈ نامی جدید ٹکنالوجی کی مدد سے سڑک تعمیر کر رہا ہے۔شہر کے اولڈ مدراس روڈ کے نیو بِن منگلا سرکل سے قریب نئی ٹکنالوجی کی مدد سے500میٹر لمبی سڑک (پری کاسٹ پوسٹ ٹینشننک کانکریٹ پیو منٹ) پری کاسٹ پینل سے ریپڈ روڈ تجربہ کے طور پر تعمیر کیا جارہا ہے،جس کابی بی ایم پی کے چیف کمشنر تشار گری ناتھ نے معائنہ کیا۔اس موقع پر انہوں نے بتا یا کہ شہر میں سڑکوں پر وہائٹ ٹاپنگ اور ٹنڈر شور کے تحت جاری سڑکوں کے تعمیری کاموں کی وجہ سے گاڑیوں کے سواروں کو کافی پریشانیوں کا سامنا کرنا پڑ رہا ہے۔ انہوں نے کہا کہ ان سڑکوں پر گاڑیوں کے گزر پر پابندی عائد کی گئی ہے۔ اس مسئلہ کو حل کرنے کے مقصد سے بی بی ایم پی تجربہ کے طور پر نئی ٹکنالوجی کی مدد سے ریپڈ سڑکوں کوتعمیر کرنے پر زور دے رہا ہے۔انہوں نے بتا یا کہ اس سے سڑک کو کیورنگ کی ضرورت محسوس نہیں ہو گی۔ اس سڑک پر فوری گاڑیوں کا گزر ہو سکتا ہے۔انہوں نے بتایا کہ مذکورہ سڑک کوپری کاسٹ پوسٹ ٹینشننک کانکریٹ پیو منٹ سے تعمیر کیا جا رہا ہے۔5 فیٹ چوڑے اور 20 فیٹ لمبے کنکریٹ سلیاب سڑک پر بچھائے جارہے ہیں۔ پہلی مرتبہ تجربہ کے طور پر اولڈ مدراس روڈ پر 500میٹر لمبے ریپڈ روڈ کو تعمیر کیا جارہا ہے،سڑک بہت جلد گاڑیوں کے گزر کے لئے کھول دی جائے گی۔بی بی ایم پی چیف کمشنر نے بتا یا کہ مذکورہ سڑک30سال سے زیادہ استعمال کے لائق ہو گی۔ انہوں نے بتا یا کہ اس طرح کی سڑکیں امریکہ میں تعمیر کی گئی ہیں۔ بی بی ایم پی نے سڑک کے تعمیری کام کی ذمہ داری آدتیہ برلاالٹراٹیک کمپنی کو دی ہے جو نئی ٹکنالوجی کا استعمال کرتے ہو ئے سڑک کو تعمیر کر رہی ہے۔ انہوں نے بتا یا کہ ملک میں پہلی مرتبہ اس ٹکنالوجی کا استعمال کر تے ہوئے سڑک تعمیر کی جارہی ہے،اگر اس تجربہ میں کامیابی ملی تو آنے والے دنوں میں شہر کی دیگر سڑکیں بھی اسی ٹکنالوجی کے تحت تعمیر کی جائیں گی۔ تشار گری ناتھ نے بتا یا کہ اولڈ مدراس روڈ کے نیو بِن منگلا سرکل سے قریب ریپڈروڈ کا تعمیری کام کل ہی سے شروع کیا گیا ہے،500میٹر لمبی سڑک میں 100میٹر کا کام مکمل کر لیا گیا ہے اور دو دنوں کے اندر سڑک کا تعمیری کام مکمل کر لیا جائے گا۔بی بی ایم پی چیف کمشنر نے ونڈ ٹینل جنکشن سے قریب زیر تعمیر انڈر پاس کے تعمیری کاموں کا بھی معائنہ کیا،یہاں این اے ایل اور اسرو اداروں کی ز مین کو قبضہ میں لی جا رہی ہے، اس انڈر پاس کے ایک حصہ کا تعمیری کام مکمل کر لیا گیا ہے دوسرے حصہ کا تعمیری کام بھی شروع کر دیا جا ئے گا۔ انہوں نے بتا یا کہ جون2023ء تک اس انڈر پاس کا تعمیری کام مکمل ہونے کی توقع ہے۔ بی بی ایم پی چیف کمشنر نے سروجنی داس جنکشن سے قریب جاری تعمیری کاموں کا بھی معائنہ کیا۔اس موقع پر بی بی ایم پی کے چیف انجینئرسمیت دیگر اعلیٰ افسران حاضر رہے۔


Recent Post

Popular Links