مہادائی معاملے پر کانگریس کو بات کرنے کا اخلاقی حق نہیں۔بومئی

RushdaInfotech December 16th 2022 urdu-news-paper
مہادائی معاملے پر کانگریس کو بات کرنے کا اخلاقی حق نہیں۔بومئی

دھارواڑ۔15/دسمبر (سالارنیوز)ریاستی وزیراعلیٰ بسوراج بومئی نے آج ان سے کئے گئے ایک سوال کے جواب میں کہاکہ کانگریس کو مہادائی معاملے پر بات کرنے کا اخلاقی حق ہی نہیں۔کانگریس نے مہادائی ڈائیورشن پراجکٹ پر کنونشن طلب کرنے کے منصوبہ کی بات کہی تھی، اس کے جواب میں وزیراعلیٰ نے یہ بات کہی۔وزیراعلیٰ بومئی نے بتایاکہ جس وقت وہ وزیرآبی وسائل تھے، اس وقت انہوں نے خون سے خط لکھا۔ اس کے نتیجے میں یہ پراجکٹ شروع ہوااور 5.5 کلومیٹر لمبا کینل تعمیر ہوا۔ اس میں کانگریس نے کیا کیا؟ کانگریس کو آڑے ہاتھوں لیتے ہوئے انہوں نے کہا کہ گوا انتخابی مہم کے دوران کانگریس لیڈر سونیاگاندھی نے کہا تھا کہ گوا سے ایک بھی پانی کی بوند پڑوسی ریاستوں کو منتقل نہیں کی جائے گی۔انہوں نے بتایا کہ کینل بی جے پی حکومت کے دور میں تعمیر ہوااور دیوار کانگریس حکومت نے تعمیر کی۔ اس سے صاف ظاہر ہے کہ کرناٹک کو مہادائی سے پانی فراہم کرنے کانگریس کس قدر سنجیدہ تھی۔سرحدی تنازع سے متعلق کئے گئے سوال پر بومئی نے کہا کہ ریاستوں کے ری۔آرگنائزیشن سے پہلے چند رپورٹس پیش کی گئی ہیں اور قانون کو اس کے بعد حتمی شکل دی گئی ہے۔اس سے موجودہ لیگل پوزیشن ظاہر ہوتی ہے۔مہاراشٹرا نے ری آرگنائزیشن قانون کے فیصلے کو چیلنج کیا ہے لیکن سپریم کورٹ نے اب تک اس معاملے میں کوئی رولنگ جاری نہیں کی ہے۔


Recent Post

Popular Links