شاہ رخ اور دیپکا کی نئی فلم پٹھان کا گیت بے شرم رنگ کا تنازع گیت کو فلم سے نکالنے کا مطالبہ،ورنہ فلم کا بائیکاٹ کرنے متالک کی دھمکی

RushdaInfotech December 16th 2022 urdu-news-paper
شاہ رخ اور دیپکا کی نئی فلم پٹھان کا گیت بے شرم رنگ کا تنازع گیت کو فلم سے نکالنے کا مطالبہ،ورنہ فلم کا بائیکاٹ کرنے متالک کی دھمکی

بنگلورو۔15دسمبر (سالارنیوز) بالی ووڈ اداکار شاہ رخ خان اور دیپیکا پڈوکونے کی نئی فلم”پٹھان“ سے بے شرم رنگ گیت کو نکال دینے کا ریاست میں شری رام سینا نے مطالبہ کیا ہے اور دھمکی دی ہے کہ اگر اس گیت کو فلم سے نکالا نہیں گیا تو ریاست بھر میں فلم کا بائیکاٹ کیا جائے گا۔شری رام سینا کے بانی پرامود متالک نے آج کہا کہ حالات پرانے دور جیسے نہیں ہیں۔لوگوں میں بیداری اور تبدیلی آچکی ہے۔بالی ووڈ فلموں کے بائیکاٹ کی آواز کااچھا ردعمل ہورہا ہے۔انہوں نے دھمکی دی کہ اگر پٹھان فلم سے بے شرم رنگ گیت کو واپس نہیں لیا گیا تو پٹھان فلم کابائیکاٹ کرنے ریاست بھر میں مہم چلائی جائے گی۔انہوں نے الزام لگایا ہے کہ بے شرم گیت بہت ہی گندہ اور واہیات ہے۔اس گیت میں یہ دکھایاگیا ہے کہ زعفرانی رنگ بے شرم ہے۔متالک نے ہمیشہ کی طرح مسلمانوں کے خلاف زہر اگلتے ہوئے کہا کہ بالی ووڈ داؤد ابراہیم کے ہاتھوں میں ہے۔وہ بالی ووڈ فلموں کے ذریعہ ہندوؤں کو نشانہ بنارہے ہیں اوران کے عقائد پر حملے کررہے ہیں۔ان کا یہ بھی کہنا ہے کہ پی کے فلم میں ہندو خداؤں کی کھل کر توہین کی گئی ہے۔یہ لوگ برقع میں ڈانس کیوں نہیں کرواتے یا چرچ میں ڈانس کیوں نہیں کرتے؟پٹھان جیسی فلموں کے ذریعہ لوجہاد، عصمت دری اور اغواء کو ترغیب دی جارہی ہے۔ ہندو لڑکیوں اور مسلم لڑکوں کو ایک ساتھ زندگی بسر کرنے پر اکسایا جارہا ہے۔دریں اثناء جنوبی ہند کے بزرگ اداکار پرکاش راج نے ہندی فلم انڈسٹری کے سوپر اسٹار شاہ رخ خان اور مشہور اداکارہ دیپیکا پڈوکونے اورنئی فلم پٹھان کے گیت بے شرم رنگ پر تنازعہ پیدا کرنے پر غصہ کا اظہار کیا ہے۔انہوں نے اس تنازعہ پر تبصرہ کرتے ہوئے کہا کہ اس فلم پر تنازعہ کھڑا کرنے والوں کوکیا یہ نظر نہیں آتا کہ زعفرانی رنگ کے لباس میں ملبوث ایک زانی کی گلپوشی ہورہی ہے۔ زعفرانی رنگ کی آڑ میں نفرت سے بھری تقاریر کی جارہی ہیں۔اراکین اسمبلی دلالی کررہے ہیں۔زعفرانی رنگ کے لباس میں سوامی جی نابالغ لڑکی کی عصمت لوٹ رہا ہے۔ان لوگوں کو یہ سب نظر کیوں نہیں آرہا ہے۔یہ لوگ یہ سہب برداشت کرسکتے ہیں لیکن فلم میں ایک لباس برداشت کرنے تیار نہیں۔ پرکاش راج نے اپنے ایک ٹوئٹ میں یہ سوال اٹھایا ہے۔ پرکاش راج کے ان ریمارکس پر پرامود متالک نے سوال کیا ہے کہ ہم ہندو ان تمام واقعات پر صبر وتحمل کا مظاہرہ کررہے ہیں۔اس کے باوجود ہم پر حملے ہورہے ہیں۔بے شرم گیت ریلیز ہونے کے صرف دو گھنٹوں میں 42ملین ناظرین سے زیادہ لوگوں نے اس گیت کو دیکھا ہے جبکہ ہندو توا کا رکنوں نے اس گیت پر اعتراض کرتے ہوئے کہا ہے کہ بالی ووڈ اداکار لوجہاد کی حوصلہ افزائی کررہے ہیں۔اس گیت میں شاہ رخ خان نے گرین رنگ کی شرٹ پہنی ہے جبکہ دیپیکا پڈوکونے نے زعفرانی رنگ کی ڈریس پہنی ہے۔


Recent Post

Popular Links