ہر مسلم نوجوان انسانیت کی خدمت کا جذبہ پیدا کرے۔ حافظ عاصم عبداللہ جمعیت یوتھ کلب اسکاؤٹس اینڈ گائیڈس کو سرٹیفکیٹ کی تقسیم

RushdaInfotech December 16th 2022 urdu-news-paper
ہر مسلم نوجوان انسانیت کی خدمت کا جذبہ پیدا کرے۔ حافظ عاصم عبداللہ جمعیت یوتھ کلب اسکاؤٹس اینڈ گائیڈس کو سرٹیفکیٹ کی تقسیم

باگے پلی:15دسمبر)نامہ نگار(انسانیت کا معاملہ مذہب سے بھی اوپر ہے۔قرآن اور ہمارے نبیؐ کی بھی تعلیم یہی ہے کہ انسانیت ہی اہم ہے،اس لئے ہم سب کو چاہئے کہ انسانیت کی خدمات کو ہر ممکنہ طور انجام دینے کی کوشش کریں۔ان خیالات کا اظہار حافظ سید عاصم عبداللہ کنوینر جنوبی علاقہ جے وائی سی بی یس جی نئی دہلی نے یہاں امبیڈکر مجسمہ کے روبرو منعقد کئے گئے جمعیت یوتھ کلب بھارت اسکاؤٹس اینڈ گائیڈس کی سرٹیفکیٹ تقسیم کرنے کے جلسہ سے خطاب کرتے ہوئے کیا۔انہوں نے کہا کہ معاشرہ کی سدھار اور خدمت خلق کیلئے جمعیت علما ہند نے نوجوانوں کو اسکاؤٹس اینڈ گائیڈ کے ذریعہ تربیت دینے کا سلسلہ شروع کیا ہے اس لئے ضروری ہے کہ ہر ایک نوجوان اس تربیت کے ذریعہ انسانیت کی خدمت کا جذبہ پیدا کرے۔جمعیت بھارت اسکاؤٹس اینڈ گائیڈس کے 9قاعدے ہیں جن پر عمل کرنے اور اپنانے سے نوجوان انسانیت کی خدمت کرنے کے لائق ہوگا۔ نوتفصیلات بتاتے ہوئے کہا کہ (۱) وفادار ہونا،کسی کو دھوکہ نہیں دینا،(۲) انصاف پسند ہونا، کسی کے ساتھ ظلم نہیں کرنا،(۳)بہادر ہونا،بزدل اور کمزور نہ ہونا دوسروں کی حفاظت کرنا،(۴)بھروسہ مند ہونا،لوگوں کا بھروسہ حاصل کرنا (۵)سب کا دوست بننا،سب کے ساتھ بہتر طور پر پیش آنا(۶)جانوروں و پرندوں سے دوستی رکھنا اور اللہ کی قدرت سے محبت رکھنا،(۷)ادب سے رہنا اور عوامی جائیدادوں کی حفاظت کرنا،(۸)بہتر سوچنا اور(۹)زبان کا پاک رکھنا۔ موصوف نے کہا کہ جمعیت یوتھ کلب سے یہ چاہا جارہا ہے کہ معاشرہ کی سدھار کیلئے نوجوانوں کو تربیت دی جائے جس سے ہر ایک نوجوان گندگی،شراب نوشی،نشہ اور موبائل کے ذریعہ بے حیائی سے پرہیز کرے اور اچھے اخلاق و کردار والا بنے،اس جلسہ کو خطاب کرتے ہوئے تعلقہ ہیلتھ افسر ڈاکٹر ستیہ نارائن ریڈی نے کہا کہ انسان جتنا سماجی خدمات انجام دیتا ہے اتنا ہی وہ صحت مند رہتا ہے، اس لئے ہمیں اپنی صحت کا خیال رکھنے کیلئے انسانی خدمات انجام دینا چاہئے، آج کے اس پروگرام میں شرکت کرکے بہت ہی مسرت ہورہی ہے، کیونکہ جمعیت یوتھ کلب کی جانب سے انسانی خدمات کرنے کی تربیت دی جارہی ہے۔ حافظ عاصم کی تقریر کا سہارا اسکول کے چیرمین ڈاکٹر محمد نور اللہ نے کنڑا زبان میں ترجمہ کیا جس سے یہاں موجود تمام سامعین بہت ہی متاثر ہوئے، کلیم اللہ ٹیچر نے مہمانوں کا استقبال کیا اور زبیر احمد خازن جمعیت العلما نے نظامت کے فرائض انجام دیئے۔اس سے پہلے مہمانوں کی موجودگی میں جمعیت العلما اور بھارت اسکاؤٹس اینڈ گائیڈس کا پرچم لہرایاگیا۔جلسہ کا آغاز حافظ فیاض کی قرأت پاک سے ہوا اور حافط کلیم نے نعت پیش کی۔اس جلسہ میں سلیم تیاگی نئی دہلی، سی عبدالقادر جنوبی علاقہ، مفتی سلیم صدر، جمعیت علما ہند، چکبالاپور ضلع،مفتی عبدالباری جنرل سکریٹری، جمعیۃ علما ہند، چکبالاپور ضلع، ریشما بانو نیاز صدر منسپل صدر باگے پلی،ضمیر احمد سی صدر،تمام مساجد کے امام و مؤذن اور تمام جمعیت علما ہند کے باگے پلی ٹاؤن اور تعلقہ کے ممبرس اور کثیر تعداد میں عمائدین شہرودیگر شریک رہے۔


Recent Post

Popular Links