نئی دہلی:7/اکتوبر(ایجنسی)امریکہ میں کھیلے جا رہے اٹلانٹا اوپن ٹی-20لیگ میں ویسٹ انڈیز کے آل راؤنڈر رحکیم کارنوال نے دھماکہ دار بلے بازی کر کے تاریخی کارنامہ انجام دے دیا۔ انھوں نے 5/اکتوبر کو کھیلے گئے میچ میں محض 77گیندوں میں 17چوکے اور 22چھکوں کی مدد سے 205رن بنا ڈالے۔ 29سالہ رحکیم کے بارے میں یہ بھی جاننا دلچسپ ہے کہ وہ دنیا کے سب سے وزن دار کرکٹر ہیں۔ ان کا وزن 140کلو ہے۔بہرحال، 6.6فیٹ لمبے رحکیم کی تاریخی اننگ کی بدولت اٹلانٹا فائر کی ٹیم نے اسکوائر ڈرائیو کو 172رنوں کے بڑے فرق سے ہرا دیا۔ اٹلانٹا فائر نے 20/اوور میں ایک وکٹ پر 326رن بنائے۔ کارنوال کے علاوہ ٹیم کیلئے اسٹیون ٹیلر نے 18گیندوں پر پانچ چھکے اور پانچ چوکے کی مدد سے 53رن کی طوفانی باری کھیلی۔ سمیع عالم نے بھی 29 گیندوں پر 53رن بنائے۔ اسکوائر ڈرائیو ٹیم کو 327رنوں کا ہدف ملا، لیکن اس نے 20/اوور میں 8وکٹ پر صرف 154رن بنائے۔ اسکوائر ڈرائیو کیلئے یشونت بالاجی نے 38/اور ورون سائی منتھا نے 36رن بنائے۔ کارنوال نے باری کی آخری گیند پر چھکا لگا کر ڈبل سنچری مکمل کی۔ وہ 199رن پر تھے جب انھوں نے چھکا لگایا اور ٹی-20کرکٹ کی پہلی ڈبل سنچری مکمل کی۔تین سال قبل ہندوستان کے خلاف بین الاقوامی کرکٹ میں قدم رکھنے والے کارنوال آف اسپن گیندبازی کے ساتھ ساتھ تیز بلے بازی کیلئے مشہور ہیں۔ رحکیم ڈیبیو کے وقت اپنے موٹاپے کے سبب موضوع بحث بنے تھے۔ کیریبین پریمیر لیگ(سی پی ایل)اور گھریلو ٹورنامنٹ میں طوفانی مظاہرہ کرنے کے بعد انھیں قومی ٹیم میں شامل کیا گیا تھا۔ کارنوال نے اپنے کیریر میں 9ٹسٹ میچ کھیلے۔ اس دوران 238رن بنانے کے ساتھ ساتھ 34وکٹ بھی لیے ہیں۔