حیدرآباد: یکم اکتو بر (ایجنسی) تلنگانہ حکومت نے دسہرہ کے موقع پر قبائلیوں کو تحفہ دیا ہے۔ حکومت نے تعلیمی اداروں میں درج فہرست قبائل (ایس ٹی) امیدواروں کیلئے ریزرویشن کو 6 فیصد سے بڑھا کر 10 فیصد کرنے کا اعلان کیا ہے۔ ریاستی حکومت نے اس تعلق سے حکم نامہ جاری کر دیا ہے۔وزیر اعلیٰ کے چندر شیکھر راؤ نے ریاست کی 10 فیصد ایس ٹی آبادی کے مدنظر یہ فیصلہ کیا ہے۔ حکم نامہ کے مطابق یہ ریزرویشن تعلیمی اداروں اور سرکاری ملازمتوں میں نافذ ہوگا۔تلنگانہ کے دفتر وزیر اعلیٰ کی جاری کردہ ایک ریلیز میں کہا گیا کہ تقریباً چھ سال قبل تلنگانہ قانون ساز اسمبلی نے درج فہرست قبائل (ایس ٹی) کے ریزرویشن کو چھ فیصد سے بڑھا کر دس فیصد کرنے کا بل منظور کیا تھا اور اسے منظوری کیلئے مرکزی حکومت کو صدر کی اجازت کیلئے بھیج دیا تھا۔ ریاستی حکومت اور راؤ کی متعدد درخواستوں کے باوجود یہ بل اب تک زیر التوا ہے۔