نیویارک-24/اگست (آئی این ایس) امریکی نیشنل آرکائیوز نے سابق صدر ڈونالڈ ٹرمپ کی فلوریڈا میں واقع رہائش گاہ سے رواں ماہ ایف بی آئی کے ایجنٹوں کے قبضے میں لیے گئے مواد کے علاوہ 700صفحات سے زیادہ خفیہ دستاویزات دریافت کی ہیں - رپورٹ کے مطابق یہ انکشافات مئی میں لکھے گئے خط میں سامنے آئے جو ریکارڈ ایجنسی نے ریپبلکن سابق صدر کے وکیل کو بھیجا تھا-نیشنل آرکائیوز اینڈ ریکارڈز ایڈمنسٹریشن کی جانب سے جنوری میں 15بکسوں میں بڑی مقدار میں خفیہ مواد برآمد کیا گیا تھا، جس میں سے کچھ کی انتہائی خفیہ کے طور پر نشاندہی کی گئی تھی - اس سے پتا چلتا ہے کہ عدالت کی جانب سے ایف بی آئی کو پام بیچ میں ٹرمپ کی رہائش گاہ مار اے لاگو ریزورٹ کی8/ اگست کو تلاشی لینے کی اجازت کیوں دی گئی-
مذکورہ خط10مئی کو قائم مقام امریکی آرکائیوسٹ ڈیبرا اسٹیڈیل وال نے ٹرمپ کے وکیل ایوان کورکورن کو بھیجا تھا- خط ایک قدامت پسند صحافی جان سولومن نے جاری کیا تھا جسے ڈونالڈ ٹرمپ نے جون میں اپنے صدارتی ریکارڈ تک رسائی کا اختیار دیا تھا-بعد ازاں نیشنل آرکائیوز نے 2روز قبل اپنی ویب سائٹ پر اس کی ایک نقل پوسٹ کی تھی-خیال رہے کہ8/اگست کی تلاشی اس وفاقی تحقیقات کا حصہ تھی کہ کیا ڈونالڈ ٹرمپ نے2020کے دوبارہ انتخاب میں ناکامی کے بعد جنوری 2021میں اپنا عہدہ چھوڑتے وقت وائٹ ہاؤس سے دستاویزات کو غیر قانونی طور پر ہٹا دیا تھا اور کیا انہوں نے ریکارڈ ہٹانے کی حکومتی تحقیقات میں رکاوٹ ڈالنے کی کوشش کی تھی-