اسلا م آباد: 22/اگست (ایجنسی)سابق وزیراعظم عمران خان کی دہشت گردی کی دفعات کے تحت درج مقدمے میں 25 /اگست تک ضمانت منظور کر لی گئی ہے۔پیر کو اسلام آباد ہائی کورٹ کے جسٹس محسن اختر کیانی اور جسٹس بابر ستار پر مشتمل ڈیویژن بینچ نے حکم سنایا۔سابق وزیراعظم عمران خان کی جانب سے دہشت گردی کی دفعات کے تحت درج مقدمے میں ضمانت قبل از وقت گرفتاری کی درخواست پر رجسٹرار آفس نے اعتراضات لگاتے ہوئے درخواست آج ہی سماعت کیلئے مقرر کی تھی۔پیر کو اسلام آباد ہائی کورٹ میں پی ٹی آئی کے وکلا بابر اعوان اور فیصل چودھری کی وساطت سے ضمانت قبل از گرفتاری کی درخواست دائر کی گئی۔دوران سماعت عمران خان کے وکیل بابر اعوان نے موقف اپنایا کہ ہم انسداد دہشت گردی کی عدالت سے رجوع کریں گے۔
جسٹس محسن اختر کیانی نے ریمارکس دیئے کہ اعتراض ہے کہ بائیومیٹرک نہیں کرایا۔ آپ بائیو میٹرک کرانے کیلئے حفاظتی ضمانت چاہتے ہیں؟بابر اعوان نے بتایا کہ انسداد دہشت گردی کی عدالت کے جج چھٹی پر ہیں اس لیے ہائی کورٹ سے رجوع کیا۔عدالت نے ریمارکس دیے کہ عمران خان کے بائیو میٹرک تصدیق کا اعتراض دور کیا جاتا ہے، تین دن کی راہداری ضمانت منظور کر رہے ہیں۔عمران خان کے خلاف انسداد دہشت گردی ایکٹ کے خلاف ایف آئی آر کے اندراج کے بعد متوقع گرفتاری کے پیش نظر پارٹی کارکنوں کی بڑی تعداد رات سے بنی گالہ میں موجود ہے۔