کولکتہ، 15 اگست (یو این آئی) مغربی بنگال کی وزیر اعلیٰ اور ترنمول کانگریس کی سپریمو ممتا بنرجی نے اتوار کو ایک ریلی میں اپنے کارکنوں سے پراسرار انداز میں پوچھا:اگر ”وہ“کل میرے گھر آئیں گے تو کیا آپ سڑکوں پر آکر احتجاج کریں گے؟۔محترمہ بنرجی کا یہ تبصرہ ایسے وقت میں آیا ہے جب مرکزی ایجنسیوں نے ان کے دو قریبی ساتھیوں کو گرفتار کیا ہے۔ تاہم انھوں نے یہ واضح نہیں کیا کہ ’وہ‘سے ان کا کیا مطلب ہے۔ ترنمول کانگریس کے کچھ دیگر رہنما بھی مختلف الزامات کے سلسلے میں مرکزی تفتیشی بیورو (سی بی آئی) یا انفورسمنٹ ڈائریکٹوریٹ (ای ڈی) کے زیرِ تفتیش ہیں۔ جواب میں کارکنوں نے یک آواز ہو کر کہا کہ وہ ان کی حمایت کرتے ہوئے احتجاج کریں گے۔محترمہ بنرجی نے پھر کارکنوں سے کہا کہ وہ جمہوری طریقے سے احتجاج کریں۔انہوں نے کہا:آپ جمہوری طریقے سے احتجاج کریں گے، ٹھیک؟ میں اپنی جنگ خود لڑوں گی۔ لیکن آپ لوگوں کو اپنی لڑائیاں لڑنی ہیں۔ اگر میرے کسی ساتھی کو بغیر کسی وجہ کے جیل میں ڈالا گیا تو پارٹی جمہوری طریقے سے احتجاج کرے گی۔ انہوں نے ریاست میں مرکزی ایجنسیوں اور اپوزیشن جماعتوں کے خلاف چوطرفہ حملہ کیا۔ انہوں نے خبردار کیا کہ ”کتنوں کو گرفتار کریں گے، میں سب کو متحد کرکے ”جیل بھرو“تحریک شروع کروں گی“۔خیال رہے کہ ترنمول کانگریس کے اس وقت کے جنرل سکریٹری اور وزیر پارتھا چٹرجی کو گزشتہ ماہ ای ڈی نے گرفتار کیا تھا، جب کہ سی بی آئی نے اس ہفتے کے شروع میں پارٹی کے بیربھوم ضلع صدر انوبرت منڈل کو گرفتار کیا تھا۔ مسٹر چٹرجی کو ریاست کے وزیر تعلیم کی حیثیت سے اپنے دور میں سرکاری امداد یافتہ اسکولوں میں تدریسی اور غیر تدریسی عملے کی تقرری میں مبینہ بے ضابطگیوں کے سلسلے میں گرفتار کیا گیا تھا۔ مسٹر منڈل کو بنگلہ دیش سے گایوں کی غیر قانونی اسمگلنگ میں ملوث ہونے کے الزام میں گرفتار کیا گیا ہے۔منڈل کی حمایت کرتے ہوئے محترمہ بنرجی نے کہا:آپ بنگال کے راستے اتر پردیش اور بہار سے گائے کیوں بھیجتے ہیں؟“۔یہ کس کی ذمہ داری ہے کہ مویشیوں کی اسمگلنگ نہ ہو۔ یہ بی ایس ایف کی ذمہ داری ہے۔ بی ایس ایف کا انچارج مرکزی وزیر کون ہے؟ وزیر داخلہ امت شاہ۔