ممبئی۔ 17اپریل (یو این آئی) فارم میں چل رہے وکٹ کیپر دنیش کارتک (ناٹ آؤٹ 66) اور آل راؤنڈر گلین میکسویل (55) کی شاندار نصف سنچریوں اور تیز گیند باز جوش ہیزل ووڈ((28 رنز دے کر 3 وکٹ اور محمد سراج((31رنز دے کر 2 وکٹ کی بہترین گیندبازی کی بدولت رائل چیلنجرز بنگلور نے ہفتہ کو آئی پی ایل کے میچ میں دہلی کیپٹلز کو 16رنز سے شکست دی۔بنگلورو نے 20اووروں میں پانچ وکٹ پر 189کا چیلنجنگ اسکور بنایا اور دہلی کو سات وکٹ پر 173تک محدود کردیا۔ اس طرح بنگلورو نے چھ میچوں میں چوتھی جیت حاصل کی جبکہ دہلی کو پانچ میچوں میں تیسری شکست کا سامنا کرنا پڑا۔ بنگلورو اب آٹھ پوائنٹس کے ساتھ ٹیبل میں تیسرے نمبر پر آگیا ہے۔ہدف کا تعاقب کرتے ہوئے پرتھوی شا 13گیندوں میں 16رنز بنا کر محمد سراج کا شکار بنے۔ ڈیوڈ وارنر نے وکٹوں کے گرنے کے درمیان 38گیندوں پر 66رنز میں چار چوکے اور پانچ چھکے لگائے۔ کپتان رشبھ پنت نے 17گیندوں پر 34رن میں تین چوکے اور دو چھکے لگائے۔ پنت کو سراج کی گیند پر وراٹ کوہلی نے ہوا میں اچھلتے ہوئے ایک ہاتھ سے لپکا۔ پنت کا وکٹ 142کے اسکور پر گرا۔ اس سے قبل مچل مارش 24 گیندوں پر 14رنز بنانے کے بعد نان اسٹرائیکر اینڈ پر رن آؤٹ ہوئے۔شاردول ٹھاکر دو چھکوں کی مدد سے 17 رنز بنانے کے بعد جوش ہیزل ووڈ کا شکار بنے۔ دہلی کا ساتواں وکٹ 156 کے اسکور پر گرا۔ اکشر پٹیل اور کلدیپ یادو نے ناٹ آؤٹ 10-10 رنز بنائے لیکن دہلی ہدف سے دور رہ گئی۔