واشنگٹن-2 فروری (یو این آئی) امریکہ نے کہا ہے کہ وہ خلیجی ریاست پر میزائل حملوں کے بعد متحدہ عرب امارات کی معاونت کیلئے جنگی طیارے بھیجے گا-غیر ملکی خبر رساں ادارے کی رپورٹ کے مطابق یمن کے حوثی باغی تحریک نے گزشتہ ماہ ابوظہبی پر میزائل حملہ کیا تھا، جبکہ دوسرا حملہ امریکی فورسز کی جانب سے ناکام بنادیا گیا تھا-ڈان کی ایک رپورٹ کے مطابق امریکی سکریٹری دفاع لائیڈ آسٹن نے ٹیلی فونک گفتگو میں ابوظہبی کے ولی عہد محمد بن زید النہیان کو کہا کہ واشنگٹن اپنے حمایتی ابوظہبی میں گائیڈڈ میزائل کو تباہ کرنے والا‘یو ایس ایس کول’بھیجے گا-امریکی محکمہ دفاع کے جاری کردہ بیان میں کہا گیا کہ سکریٹری دفاع نے ولی عہد کو اپنے اس فیصلے کے حوالے سے بھی آگاہ کیا جس کے تحت موجودہ خطروں سے لڑنے میں مدد کیلئے امریکہ کی جانب سے یو اے ای میں ففتھ جنریشن جنگی طیارے نصب کیے جائیں گے ’-انہوں نے کہا کہ اس امداد کا مقصد یہ واضح کرنا ہے کہ امریکہ دیرینہ حکمت عملی کے تحت اپنے شراکت دار یو اے ای کے ساتھ کھڑا ہے -یو اے ای کی جانب سے رواں ہفتے کے آغاز میں اسرائیلی صدر کے دورے کے دوران ایک میزائل کو روکا گیا تھا، گزشتہ دو ہفتوں کے دوران سعودی اتحادی افواج کے خلاف لڑنے والے ایرانی حمایت یافتہ گروپ کی جانب سے یہ تیسرا حملہ تھا، اتحادی افواج میں یو اے ای بھی شامل ہے -اس سے ایک ہفتے قبل امریکی فوج نے کہا تھا کہ انہوں نے دو میزائلوں کے روکنے کیلئے متعدد پیٹریاٹ میزائل پھینکے، جس کے بارے میں حوثیوں کا کہنا تھا کہ مذکورہ میزائلوں کے ذریعے انہوں نے یو اے ای کی الظفرہ ایئربیس کو نشانہ بنایا تھا-گزشتہ ہفتے اقوام متحدہ میں امریکی سفیر نے کہا تھا کہ یو اے ای اپنی دفاعی صلاحیتوں کو مزید بڑھا سکتا ہے اور اس حوالے سے امریکہ سے گفتگو کی جارہی ہے -لائیڈ آسٹن نے کہا تھا کہ امریکہ، یو اے ای کو وقت سے پہلے خبردار کرنے والا انٹیلی جنس سسٹم فراہم کرنے کے ساتھ فضائی دفاعی تعاون جاری رکھے گا-خطے کے کمرشیل اور سیاحتی حب یو اے ای پر حملہ یمن جنگ کو مزید بڑھاوا دے رہا ہے، جس میں حوثیوں کی جانب سے سعودی عرب پر بارہا میزائل اور ڈرون پھینکے گئے -یمن میں سعودی قیادت میں فوجی اتحاد2015میں عمل میں آیا تھا جب حوثیوں نے بین الاقوامی تسلیم شدہ حکومت کو دارالحکومت صنعا سے بے دخل کردیا تھا-