ابوظہبی۔ 2نومبر (یو این آئی) جنوبی افریقہ نے اپنے تیز گیند بازوں کگیسو ربادا اور اینرک نورٹیز کی تین تین وکٹوں کی بدولت آئی سی سی ٹی 20 ورلڈ کپ کے گروپ ایک کے میچ میں بنگلہ دیش کو چھ وکٹوں سے شکست دے دی۔جنوبی افریقہ نے ٹاس جیت کر بولنگ کا فیصلہ کیا اور بنگلہ دیش کو 18.2 اوورز میں صرف 84 رنز پر ڈھیر کردیا۔ اس کے بعد 13.3 اوورز میں چار وکٹوں کے نقصان پر 86 رنز بنا کر جنوبی افریقہ نے آرام سے میچ جیت لیا۔ کپتان ٹیمبا باؤما 28 گیندوں پر تین چوکوں اور ایک چھکے کی مدد سے 31 رنز بنا کر ناٹ آؤٹ رہے۔ ملر بھی دو گیندوں میں ایک چوکے کی مدد سے پانچ رنز بنانے کے بعد ناٹ آؤٹ رہے۔ اس کے علاوہ رائسی وینڈر ڈیوسین اور کوئنٹن ڈی کاک نے بالترتیب 27 گیندوں پر 22 اور 15 گیندوں پر 16 رنز بنائے۔بنگلہ دیش کی جانب سے تسکین احمد چار اوورز میں 18 رنز دے کر دو وکٹیں لے کر کامیاب بولر رہے۔ ان کے علاوہ مہدی حسن اور نسیم احمد نے ایک ایک وکٹ حاصل کی۔اس سے قبل جنوبی افریقہ کے گیند بازوں نے خطرناک گیند بازی کا مظاہرہ کرتے ہوئے بنگلہ دیش کے بیٹنگ آرڈر کی کمر توڑ دی۔ ربادا نے چار اوورز میں محض 20 رنز کے عوض تین اور نورٹیز نے 3.2 اوورز میں صرف آٹھ رنز کے عوض تین وکٹیں حاصل کیں، چائنا مین بولر تبریز شمسی نے 21 رنز کے عوض دو اور ڈوین پریٹوریئس نے 11 رنز کے عوض ایک وکٹ حاصل کی، بنگلہ دیش کی پوری ٹیم 84 رن پر آل آؤٹ ہوگئی۔
بنگلہ دیش کی جانب سے اوپنر لٹن داس نے 36 گیندوں پر ایک چوکے کی مدد سے 24، آٹھویں نمبر کے بلے باز مہدی حسن نے 25 گیندوں میں دو چوکوں اور ایک چھکے کی مدد سے 27 اور شمیم ]؟[]؟[حسین نے 20 گیندوں پر 11 رنز بنائے۔ بنگلہ دیشی ٹیم محض 34 رنز پر اپنی پانچ وکٹیں گنوانے کے بعد پھر میچ میں واپسی نہ کر سکی۔ہدف کے تعاقب میں کپتان ٹیمبا باؤما 28 گیندوں پر تین چوکوں اور ایک چھکے کی مدد سے 31 ناٹ آؤٹ، رائسی وینڈیر ڈیوسن 27 گیندوں پر دو چوکوں کی مدد سے 22 رنز اور اوپنر کوئنٹن ڈی کاک نے 15 گیندوں میں تین چوکوں کی مدد سے 16 رنز بنا کر ٹیم کو آسان فتح دلا دی۔چارمیچوں میں جنوبی افریقہ کی تیسری جیت ہے اور اس کے چھ پوائنٹس ہیں اور وہ اپنے گروپ میں انگلینڈ کے بعد دوسرے نمبر پر ہے۔ جنوبی افریقہ کا آخری گروپ میچ ہفتے کو انگلینڈ کے خلاف ہے جس کے بعد ہی فیصلہ کیا جائے گا کہ جنوبی افریقہ کو سیمی فائنل میں انٹری ملتی ہے یا نہیں۔