احمد آباد،20فروری (یواین آئی) ہندوستانی کرکٹ ٹیم کے کپتان ویراٹ کوہلی نے اپنے 2014 کے انگلینڈ کے دورے کی یاد تازہ کرتے ہوئے کہا کہ انگلینڈ کے دورے پر جب وہ پانچ ٹسٹ میں ایک بھی نصف سنچری نہیں بناپائے تھے تب وہ اپنے آپ کو دنیا کا سب سے تنہا شخص محسوس کررہے تھے۔ وہ اس دورے کو اپنے کیریئر کا بدترین وقت سمجھتے ہیں۔وراٹ نے یہ انکشاف ناٹ کرکٹ پوڈکاسٹ پر بات چیت کے دوران کیا۔ انہوں نے اس وقت اپنی ذہنی حالت کے بارے میں کہا کہ یہ جان کر اچھا نہیں لگتا کہ آپ رنز بنانے کے اہل نہیں ہیں۔ میرے خیال میں تمام بلے بازوں کو محسوس ہوتا ہے کہ کچھ ایسے حالات ہیں جو ہمارے کنٹرول میں نہیں ہیں۔ ہمیں آسانی سے سمجھ میں نہیں آتی ہے کہ اس پر قابو کیسے پایا جائے۔ انگلینڈ2014کا دورہ میرے لئے ایسا ہی ایک مرحلہ تھا جب میں سچ مچ چیزوں کو تبدیل کرنے کے لئے کچھ کرنے سے قاصر تھا۔ یہ نہیں کہا جاسکتا کہ میرے پاس لوگ نہیں تھے لیکن ایک پیشہ ور نہیں تھا جس سے میں کچھ بتا پاتا اور میں سمجھ پاتا کہ میں کیا کر رہا ہوں۔ میرے خیال میں یہ ایک بڑی وجہ تھی۔