نئی دہلی،08 فروری (آئی این ایس) انٹرنیشنل کرکٹ کونسل (آئی سی سی) نے آج آئی سی سی پلیئر آف دی منتھ ایوارڈز فاتح کا اعلان کیا۔ آئی سی سی ہر مہینے اسی طرح کرے گی، جو کھلاڑی مہینے میں انٹرنیشنل کرکٹ کے تمام فارمیٹ میں عمدہ کارکردگی کا مظاہرہ کریں گے ان کو ایوارڈ دیا جائے گا۔ مرد اور خواتین کرکٹرز کی بہترین پرفارمنس کو اس سے پہچانا جائے گا۔ ان ایوارڈز کا اعلان پہلی بار کیا گیا ہے، جس میں ہندوستانی وکٹ کیپر بلے باز رشبھ پنت نے کامیابی حاصل کی ہے۔آسٹریلیا کے خلاف دو ٹیسٹ میں اپنی کارکردگی کی وجہ سے ہندوستانی بلے باز رشبھ پنت نے جنوری 2021 میں آئی سی سی پلیئر آف دی منتھ کا اعزاز حاصل کیا۔ انہوں نے سڈنی میں 97 اور برسبین میں ناقابل شکست 89 رنز بنائے۔ ان کی اننگز کی بنیاد پر ہندوستان نے تاریخی جیت درج کی۔ جنوبی افریقہ کی شبنم اسماعیل نے جنوری کے مہینے میں تین ون ڈے اور دو ٹی ٹونٹی انٹرنیشنل میں عمدہ کارکردگی کے لئے آئی سی سی ویمن پلیئر آف دی منتھ جیتا۔پاکستان کے خلاف ون ڈے سیریز جیتنے والی جنوبی افریقہ کی خواتین ٹیم کے لئے شبنم اسماعیل نے سات وکٹیں حاصل کیں، جبکہ انہوں نے ٹی ٹوئنٹی سیریز میں 5 وکٹیں حاصل کیں۔ جنوری کے مہینے میں کچھ سنسنی خیز کرکٹ دیکھنے کو ملی۔ اسی وجہ سے انٹرنیشنل کرکٹ کونسل نے رشبھ پنت، جو روٹ اور پال اسٹرلنگ کو نامزد کیا تھا، لیکن ووٹنگ کے بعد رشبھ پنت کو فاتح قرار دے گیا۔