چنئی، 8فروری (یو این آئی) آف اسپنر روی چندر اشون نے شاندار گیندبازی کرتے ہوئے 61رن پر چھ وکٹ لیکر انگلینڈ کو پہلے کرکٹ ٹیسٹ میچ کے چوتھے دن پیر کو دوسری اننگز میں 178رن پر سمیٹ دیا جس سے ہندستان کو یہ مقابلہ جیتنے کے لئے 420رن کا مشکل ہدف ملا ہے۔انگلینڈ نے پہلی اننگز میں 578رن کا بڑا اسکور بنایا جبکہ ہندستان نے چوتھے دن چھ وکٹ پر 257رن سے آگے کھیلنا شروع کیا اور اس کی پہلی اننگز 337رن پر ختم ہوئی۔ انگلینڈ کوپہلی اننگز میں 241رن کی اہم سبقت حاصل ہوئی۔ انگلینڈ نے دوسری اننگز میں 178رن بنائے اور اس نے ہندستان کے سامنے 420رن کا مشکل ہدف رکھا۔اشون نے دوسری اننگز میں گیندبازی کی شروعات کی اور ٹرن اور اچھال لیتی پچھ کا فائدہ اٹھاتے ہوئے 17.3اوور میں 61رن پر چھ وکٹ لیکر انگلینڈ کو 46.3اوور میں 178رن پر سمیٹ دیا۔ اشون نے اس طرح 28ویں مرتبہ اننگز میں پانچ وکٹ لئے۔اشون نے انگلینڈ کے خلاف چوتھی اننگز میں پانچ وکٹ اور چنئی میں تیسری بار اننگز میں پانچ وکٹ لئے۔ اشون نے اس طرح میچ میں نو وکٹ پورے کئے۔ انہوں نے پہلی اننگز میں تین وکٹ لئے تھے۔لیفٹ آرم اسپنر شاہباز ندیم نے پندرہ اوور میں 66رن پر دو وکٹ، تیز گیند باز ایشانت شرما نے سات اوور میں 24رن پر ایک وکٹ اور جسپریت بمراہ نے چھ اوور میں 26رن پر ایک وکٹ لیا۔ایشانت دوسری اننگز میں ڈینیل لارنس کا وکٹ لینے کے ساتھ ہی 300وکٹ لینے والے چھٹے ہندستانی گیندباز بن گئے۔ وہ ہندستان کی طرف سے یہ کامیابی حاصل کرنے والے تیسر تیز گیند باز بن گئے۔انگلینڈ کی دوسری اننگز میں کپتان جو روٹ نے سب سے زیادہ چالیس رن بنائے۔ رو ٹ نے 32گیندوں کی اننگز میں سات چوکے لگائے۔ روٹ نے پہلی اننگز میں 218رن کی شاندار اننگز کھیلی تھی۔ روٹ کا یہ 100واں ٹیسٹ ہے اور اس میچ میں انہوں نے مجموعی طورپر 258رن بنائے۔اولی پوپ نے 28، ڈومنک بیس نے 25، جوس بٹلر نے 24، ڈومنک سبلے نے 16اور ڈینئل لارنس نے 18رن بنائے۔ اوپنر روری برنس کا کھاتہ نہیں کھلا جبکہ بین اسٹوکس نے سات رن بنائے۔ انگلینڈ کے آخری چار وکٹ محض 13رن جوڑ کر گرے اور اس کی دوسری اننگز آخری سیشن میں 178رن پر سمٹ گئی۔ جیک لیچ آٹھ رن پر ناٹ آوٹ رہے۔ اشون نے دوسری اننگز میں گیندبازی کی شروعات کی اور پہلی ہی گیند پر برنس کو اجنکیا رہانے کے ہاتھوں کیچ کرا دیا۔ اشون نے پھر سبلے، اسٹوکس، بیس، جوفرا آرچر اور جیمس اینڈرسن کے وکٹ لئے۔ ندیم نے پوپ اور بٹلر کو آوٹ کیا جبکہ ایشانت نے لارنس اور بمراہ نے کپتان روٹ کی بیش قیمتی وکٹ لیا۔انہوں نے کپتان کو ایل بی بلیو آوٹ کیا۔اس سے پہلے ہندستان نے صبح 6 وکٹ پر 257رن سے آگے کھیلنا شروع کیا۔ واشنگٹن سندر نے 33رن روی چندر ن اشون نے آٹھ رن سے اپنی اننگز کو آگے بڑھایا۔ ہندستان کی پہلی اننگز 95.5اوور میں 337رن پر ختم ہوئی۔سندر 138گیندوں پر 12چوکوں اور دو چھکوں کی مدد سے 85رن بناکر ناٹ آوٹ رہے۔ ان کے پاس کوئی جوڑی دار نہیں بچا کہ وہ اپنی سنچری مکمل کرپاتے۔ اشون نے 9گیندو ں میں تین چوکوں اور یک چھکے کی مدد سے 31رن بنائے۔
ہندستان کے نیچے کے بلے باز کچھ زیادہ نہیں کرسکے اور جلدی جلدی آوٹ ہوگئے۔شاہباز ندیم نے اور جسپریت بمراہ کا کھاتہ نہیں کھلا جبکہ ایشانت شرما نے چار رن بنائے۔ سندر اور اشون نے ساتویں وکٹ کے لئے 80رن کی شراکت کی۔ ہندستان نے آخری چار وکٹ 32رن جوڑ کر گنوائے۔انگلینڈ کی طرف سے آف اسپنر بیس نے 76رن پر چار وکٹ لئے جبکہ اینڈرسن، آرچر اور جیک لیچ نے دو دو وکٹ لئے۔