میلبورن، 27دسمبر (یو این آئی) کپتان اجنکیا رہانے(104ناٹ آؤٹ) کی ذمہ دار کپتانی والی سنچری اور ان کے آل راؤنڈر رویندر جڈیجہ (40ناٹ آؤٹ) کے ساتھ چھٹے وکٹ کے لئے 104رن کی ناٹ آؤٹ شراکت داری کی بدولت ہندوستان نے آسٹریلیا کے خلاف باکسنگ ڈے ٹسٹ کے دوسرے دن اتوار کوپانچ وکٹ پر 277 رن بناکر پہلی اننگز میں 82 رن کی اہم برتری حاصل کرلی۔رہانے نے اپنے کیریئر کی 12 ویں اور بطور کپتان پہلی سنچری اسکور کی۔ رہانے کا یہ بطور کپتان تیسرا ٹسٹ ہے اور یہ سنچری ایسے وقت میں آئی جب ہندوستان کو اس کی اشد ضرورت تھی۔ ہندوستان پہلا ٹسٹ ہار گیا، ایڈیلیڈ میں ان کی دوسری اننگز ان کے کم ترین اسکور 36 تک سمٹ گئی اور باقاعدہ کپتان ویراٹ کوہلی جنوری میں اپنے پہلے بچے کی ولادت کی وجہ سے وطن واپس ہوگئے تھے۔32 سالہ رہانے نے اس طرح کے مشکل حالات میں جنگجو کی طرح محاذ سنبھال کر سنچری والی اننگز کھیلی۔ رہانے نے پیٹ کمنس کو چار چوکے لگاکر اپنی سنچری مکمل کی۔ رہانے کے سنچری مکمل کرتے ہی پورے ہندوستانی کیمپ میں سبھی نے اپنی جگہ پر کھڑے ہوکر اپنے کپتان کا اس شاندار اننگز پرتالیاں بجاتے ہوئے خیرمقدم کیا۔اگرچہ رہانے کو اپنی سنچری میں دو زندگیاں بھی ملیں، لیکن انہیں چھوڑ دیا گیا تو، اس سنچری کو غیر ملکی سرزمین پر ہندوستان کی بہترین سنچریوں میں شمار کیا جائے گا۔ رہانے اسٹمپ تک 200 گیندوں میں ناٹ آؤٹ 104 رن میں 12 شاندار چوکے لگاچکے ہیں۔ جڈیہ 104 گیندوں میں ایک چوکے کی مدد سے 40 رنز بنا کر کریز پر موجود ہیں۔
دونوں کے درمیان چھٹے وکٹ کے لئے 194 گیندوں میں 104 رنز کی ناٹ آؤٹ شراکت داری ہوچکی ہے۔ہندوستان کی پہلی اننگز میں نوجوان اوپنر شبھمن گل نے 45، چیتشور پجارا نے 17، ہنوما وہاری نے 21 اور وکٹ کیپر رشبھ پنت نے 29 رنز بنائے۔ آسٹریلیا کی جانب سے مشل اسٹارک اور پیٹ کمنس نے دو، دو اور ناتھن لیون نے ایک وکٹ حاصل کیا۔رہانے کو ان کی اننگز میں دو زندگیاں ملیں جن کا افسوس آسٹریلیا کو رہے گا۔ دونوں دفعہ بدقسمت بولر مشل اسٹارک تھے۔ اسٹیون اسمتھ نے رہانے کا پہلی بار سلپ پر کیچ چھوڑا، تب ان کا اسکور 73 رن تھا۔ دوسری بار ان کا کیچ 104 رنز کے اسکور پر ٹریوس ہیڈ نے چھوڑ دیا۔ ہیڈ نے گیند کو پکڑ لی تھی لیکن ہاتھ زمین سے ٹکراتے ہی گیند ہاتھوں سے نکل گئی۔ اس زندگی ملنے کے فوراً بعد ہی، بارش ہوگئی اور دوسرے دن کا کھیل بھی ختم ہوگیا۔ہندوستان نے دن کا آغاز کل کے ایک وکٹ پر 36 رنز سے کیا تھا۔ گل نے 28 اور پجارا نے سات رنز سے اپنی اننگز کو آگے بڑھایا۔ ہندوستان کا دوسرا وکٹ 61 کے اسکور پر گرا جب کمنس نے گل کو وکٹ کیپر ٹم پین کے ہاتھوں کیچ کردیا۔ اپنا پہلا میچ کھیل رہے گل نے یادگار کارکردگی کا مظاہرہ کرتے ہوئے 65 گیندوں پر 45 رنز کی عمدہ اننگز میں آٹھ چوکے لگائے۔ٹسٹ ٹیم میں ردھیمان ساہا کی جگہ شامل کئے گئے پنت نے اپنی پوری افادیت کا ثبوت دیا اور اپنے کپتان کا بخوبی ساتھ دیا۔ پنت چائے کے وقفے سے کچھ قبل آؤٹ ہوئے۔ پنت کو اسٹارک نے پین کے ہاتھوں وکٹ کے پیچھے کیچ کرایا۔ پنت کا وکٹ 173 کے اسکور پر گرا۔ پنت نے 40 گیندوں پر 29 رنز میں تین چوکے لگائے۔رہانے پھر جڈیجہ کے ساتھ ٹیم کو چائے کے وقت تک 189 تک لے گئے۔ چائے کے وقفے تک رہا نے 53 اور جڈیجہ نے چار رن بنائے۔ دونوں بلے بازوں نے دن کے آخری سیشن میں ٹیم کو مزید کوئی نقصان نہیں ہونے دیا۔ اگرچہ 73 کے اسکور پر رہانے نے کو زندگی ملی، جس کا فائدہ اٹھاتے ہوئے رہانے نے اپنی سنچری مکمل کی۔ دن کے اختتام تک ہندوستان کو 82 رنز کی نمایاں برتری حاصل تھی۔آسٹریلیا کے لئے اسٹارک نے 61 رن دے کر دو وکٹ، کمینز نے 71 رن پر دو وکٹ اور لیون نے 52 رنز دے کر ایک وکٹ حاصل کیا۔