بھارتی اداکارہ دیا مرزا نے سوشل میڈیا کا سہارا لیتے ہوئے خود پر منشیات استعمال سے متعلق لگنے والے الزامات کی تردید کردی۔سْشانت سنگھ کی خود کشی کے بعد سے ہندوستانی فلم انڈسٹری کا نقشہ ہی بدل کر رہ گیا ہے، بڑے بڑے ناموں پر مشتمل فلمیں نا پسند کی جا رہی ہیں جبکہ ٖ فلم انڈسٹری کے 90 فیصد فنکاروں کے منشیات استعمال کرنے کے بھی الزامات سامنے آرہے ہیں۔ان ہی الزامات میں نیا نام خوبصورت اداکارہ دیا مرزا کا سامنے آیا ہے جن پر منشیات کے استعمال کرنے کا الزام لگایا جا رہا ہے۔دیا مرزا نے اپنے اوپر لگنے والے الزامات پر حیرانی کا اظہار کرتے ہوئے مائیکرو بلاگنگ ویب سائٹ ٹوئٹر پر کچھ پیغامات شیئر کئے ہیں جن میں انہوں نے منشیات استعمال کرنے کی تر دید کی ہے۔دیا مرزا کا اپنے ٹوئٹس میں کہنا ہے کہ ’وہ منشیات استعمال کرنے کی خبر کی سختی اور واضح طور پر تردید کرنا چاہتی ہیں، یہ ایک جھوٹی اور بے بنیاد خبر ہے۔‘انہو ں نے میڈیا کو مخاطب کرتے ہوئے کہا ہے کہ ’اس طرح کی غیر قانونی رپورٹنگ کا براہ راست اْن کی امیج پر اثر پڑتا ہے، ایسی رپورٹنگ سے اْن کے کیریئر کو نقصان پہنچ رہا ہے جو کہ انہوں نے برسوں محنت کر کے بنایا ہے۔‘اْن کا ایک اور ٹوئٹ میں کہنا تھا کہ ’انہوں نے زندگی میں کبھی کسی بھی قسم کا نشہ آور یا غیر قانونی مواد نہ ہی خریدا اور نہ ہی کھایا ہے، وہ ہندوستان کے قانون کی پاسداری کرنے والی شہری ہونے کے ناطے اپنے اوپر لگنے والے سب ہی جھوٹے الزامات پر قانونی چارہ جوئی کرنا چاہتی ہیں۔‘دیا مرزا نے اپنے ٹوئٹ میں مداحوں کی جانب سے ملنے والی سپورٹ کا بھی شکریہ ادا کیا ہے۔